Намеснік галоўнага рэдактара газеты «Народная воля» Марына Коктыш вечарам 31 сакавіка была выклікана на допыт у КДБ у сувязі са знікненнем Наталлі Радзінай.
Падрабязнасці допыту, які доўжыўся з 21.30 да 22.10, журналістка не паведаміла, бо дала падпіску аб невыдаванне тайны следства.
«Хацелася б, каб з Наташай усё было ў парадку. Усе хвалююцца: бацькі, журналісты, адвакат», — сказала Коктыш БелаПАН.
З 21.30 да 22.30 у КДБ праходзіў допыт галоўнага рэдактара газеты «Наша ніва» Андрэя Скурко. З яго таксама ўзята падпіска аб невыдаванні тайны следства.
Рэдактара сайта charter97.org Наталля Радзіна да 11 гадзін 31 сакавіка павінна была прыбыць з Кобрына ў Мінск для правядзення «следчых дзеянняў» у КДБ. Радзіна з’яўляецца абвінавачанай па крымінальнай справе аб масавых беспарадках у сталіцы 19 снежня 2010 года. З 20 снежня па 28 студзеня яна знаходзілася ў СІЗА КДБ. Да 30 сакавіка жыла ў бацькоў у Кобрыне, па месцы прапіскі, і працягвала займацца журналісцкай дзейнасцю.
«Я мяркую, што мне будзе прад’яўлена канчатковае абвінавачанне і я пачну знаёміцца з матэрыяламі крымінальнай справы», — заявіла БелаПАН Радзіна ў дзень ад’езду з Кобрына.
«Вечарам у 21.30 я яе пасадзіла на цягнік. Сёння я да яе датэлефанавацца не магу. Мне яна таксама не тэлефанавала», — паведаміла БелаПАН маці Радзінай Надзея Максімаўна. Паводле яе слоў, дамоў да іх прыходзіў следчы, які цікавіўся, дзе можа знаходзіцца Наталля.
Мабільны тэлефон Радзінай адключаны.
Каментары