Журналістаў «Газеты Слонімскай» выклікалі ў пракуратуру. Вольга Шынкевіч й Мікола Канановіч далі тлумачэньні наконт сваіх публікацый, у якіх вялася гаворка пра цяжкае жыцьцё састарэлых людзей. Загадчыца аддзелу працы й сацыяльнай абароны райвыканкаму, Кацярына Руткоўская, абвінаваціла журналістаў у наўмысным скажэньні фактаў. Героі матэрыялаў падтрымалі раённую чыноўніцу.
Журналісты «Газеты Слонімскай» Вольга Шынкевіч й Мікола Канановіч давалі днямі тлумачэньні ў раённай пракуратуры па сваіх публікацыях, у якіх вялася гаворка пра цяжкае жыцьцё састарэлых людзей. Загадчыца аддзелу працы й сацыяльнай абароны райвыканкаму, Кацярына Руткоўская, абвінаваціла журналістаў у наўмысным скажэньні фактаў й зьвярнулася ў пракуратуру. Героі матэрыялаў падтрымалі раённую чыноўніцу.
83-гадовы сланімчанін, вэтэран вайны, на працягу некалькіх месяцаў чакаў, каб мясцовыя ўлады дапамаглі адрамантаваць дах на ягонай хаце. Мікола Канановіч выяжджаў да пэнсіянэра пасьля яго звароту ў рэдакцыю. А ў пракуратуры ён даведаўся зусім іншае:
(Канановіч:) «Ён нават напісаў такі ліст у райвыканкам, што да мясцовых уладаў ня мае ніякіх прэтэнзій. А датычна газэты – маўляў, не зразумеў, зь якой менавіта газэты да яго прыехалі, бо надта хутка нешта пыталіся». Дарэчы, дах на ягонай хаце, са слоў Канановіча, дагэтуль не адрамантаваны.
Журналістка Вольга Шынкевіч распавяла чытачам пра 80-гадовую Надзею Пясецкую, якая жыве ў паўразбуранай хаце, без сьвятла, сьпіць у адзеньні, не заўсёды можа дайсьці да крамы, а дапамагчы няма каму. Вольга нават прывезла бабульцы ад рэдакцыі харчоў й тая вельмі цешылася.
Пасьля публікацыі матэрыялу да спадарыні Пясецкай наведаліся супрацоўнікі сацыяльнага аддзела, спраўдзілі ўмовы яе жыцьця й сказалі, што забяруць яе ў дом састарэлых, а бабуля гэтага вельмі ня хоча таму й адмовілася ад таго, што раней распавядала журналістцы. Болей на парог сваёй паўразваленай хаты яна Вольгу Шынкевіч не пускае. Журналістка хоць й расхвалявалася, але хоча давесьці справу да канца.
(Шынкевіч:) «Вельмі хочацца напісаць пра тое, як часам здараецца, калі ты робіш дабро, а сытуацыя паварочваецца да цябе зусім дзіўным чынам».
(Канановіч:) «Я ў той дзень апошнім размаўляў са сьледчым Карытцам. Ён мне сказаў: «Шкада дарэмна патрачанага й вашага, й нашага часу».
Фота з сайту Газеты Слонімскай
Цяпер чытаюць
Што за Дзмітрый Скіндзераў, які абвясціў вайну Ціханоўскай? Супрацоўніцтва з ГУБАЗіКам, даўгі ў Беларусі, даўгі ў Літве23
Каментары