13 студзеня 2007 года ў Таварыстве Беларускай культуры ў Літве адбылося сьвяткаваньне Старога Новага году. Заля ўпрыгожана ў стылі мадэрн, гэтым прафэсійна займалася вядомая беларуская мастачка Хрысьціна Балаховіч. На сьцяне зіхацелі папяровыя зорачкі, на стале — навагодні букет.
13 студзеня 2007 года ў Таварыстве Беларускай культуры ў Літве адбылося сьвяткаваньне Старога Новага году. Заля ўпрыгожана ў стылі мадэрн, гэтым прафэсійна займалася вядомая беларуская мастачка Хрысьціна Балаховіч. На сьцяне зіхацелі папяровыя зорачкі, на стале — навагодні букет.
Распачаў імпрэзу старшыня ТБК Хведар Нюнька. Ён павіншаваў прысутных з хуткім Новым, 2007-м, годам, пажадаў плёну ў асабістым і грамадзкім жыцьці, больш рабіць намаганьняў і высілкаў на карысьць Бацькаўшчыны. У прыватнасьці, адзначыў працу сянюнаса (войта) Вяркяйскай сянюніі г.Вільні Вацлава Гульбіновіча, кіраўніка сянюніі, якая заняла першае месца сярод дваццаці ў горадзе па выніках працы за мінулы год, а Вацлаў яшчэ зьяўляецца чальцом рады ТБК, дзе таксама шмат працы.
У таварыстве за мінулы год прайшло шмат значных мерапрыемстваў, сярод іх: дні беларуска‑ літоўскай культуры, прысьвечаныя 100‑годзьдзю «Нашай Нівы», прэзентацыя кнігі Ул.Пецюкевіча «Узьняўся белы птах», на якой прысутнічалі госьці з Італіі і Беларусі, прэзентацыю кнігі М.Казлоўскага «Галасы разбуджаных птушак», якая ўвайшла ў сьпіс лепшых кніг мінулага года.
Наступным выступоўцам быў сябра таварыства, карэспандэнт радыё «Полёнія» Андрусь Старавойтаў. Ён эмацыйна распавёў пра палітычнае становішча на Беларусі, гаварыў пра тое, што адбывалося ў Вільні 13 студзеня 1991 года, тады ў абарону незалежнасьці Літвы сталі прадстаўнікі ўсіх нацыянальнасьцяў, сярод узнагароджаных мэдалямі ёсьць дзесяць беларусаў, у тым ліку тры сябры таварыства.
Алесь Адамковіч распачаў цыкл лекцыяў «Беларускія карані на Віленшчыне», першую лекцыю прысьвяціў ксяндзу Юрыю Матулевічу‑ шчыраму абаронцу вернікаў ‑ беларусаў. Літовец па нацыянальнасьці, ён стаяў на баку пакрыўджаных беларусаў, за што цярпеў як з боку палякаў, так і з боку літоўцаў. Як сьвятар ён змагаўся, каб вернікі зьвярталіся да Бога на роднай мове. Прайшлі гады, і шчырыя вернікі‑беларусы ў знак пашаны і прысьвяцілі першую лекцыю сьвятару Ю.Матулевічу.
Андрусь Старавойтаў прасьпяваў гімн «Магутны Божа» на словы Натальлі Арсеньневай.
Мастак Алег Аблажэй паказаў апошнія ілюстраваныя ім кнігі казак, якія выйшлі ў выдавецтвах Літвы, Расеі, Польшчы, падзяліўся творчымі плянамі.
Напрыканцы афіцыйнай часткі прысутныя ў залі паглядзелі відэафільм «Белы легіён», зьняты польскім рэжысёрам у 2006 годзе, які сваім патрыятычным зьместам нікога не пакінуў абыякавым.
Завяршылася мерапрыемства за сьвяточным сталом. Так цікава і зьмястоўна ў ТБК адсьвяткавалі Калядкі, праводзілі Стары і сустрэлі Новы год.
Цяпер чытаюць
35 маладых беларусаў і беларусак, за якімі варта сачыць: апублікаваны першы спіс Next 3524
Каментары