Былы лідар «Правага Альянсу» Юрый Карэтнікаў вярнуўся ў Беларусь.
Ён пакінуў краіну таксама пасля падзей на Плошчы — выехаў у Кіеў.
«Трэба ж калісьці вяртацца. Страху не было, бо віны за сабой ніякай не адчуваю. Хаця маральна быў гатовы да любой сітуацыі». Юрый ужо паспеў атрымаць ліст з КДБ. Але гэта тычыцца канфіскаваных у яго пры ператрусе рэчаў. Каб іх вярнулі, КДБ просіць непасрэдна Карэтнікава звярнуцца да іх.
Увесь час Юрый знаходзіўся ва Украіне. Думкі пра палітычны прытулак былі. «Але я беларускі нацыяналіст. І таму такія думкі гнаў прэч».
У верасні Юрый заявіў, што «Правы Альянс» спыняе палітычную дзейнасць і скасоўваецца пасада лідара ў арганізацыі. «Я не быў у краіне на той момант дзевяць месяцаў. Больш за 20 нашых людзей пацярпелі за ўдзел у падзеях 19 снежня. І мы вырашылі, калі хочам захаваць нашу структуру, мусім пайсці на такі крок. Не мы вырашаем, як наша дзейнасць будзе ацэнена наверсе.
Памянялася тактыка і стратэгія, але не памяняліся ідэалы».А сваю працу Юрый збіраецца накіраваць на барацьбу з алкагалізмам, наркаманіяй, за беларускую школу.
Сябра ініцыятыўнай групы Андрэя Саннікава і яго ахоўнік Леанід Навіцкі цяпер знаходзіцца ў Францыі. Разам з сям’ёй ён там папрасіў палітычнага прытулку. Беларусь Навіцкі пакінуў пасля адбыцця 15 сутак адміністратыўнага арышту за ўдзел у Плошчы.
Леанід адзначае, што адразу, як трапіў у Францыю, не прасіў палітычнага прытулку. Такое рашэнне прыняў толькі пасля суда над Андрэем Саннікавым. Тады ў пачатку лета да Леаніда прыехалі і жонка з дзвюма дочкамі.
У Францыі лёс сям’і Навіцкіх яшчэ не вырашаны. Па словах Леаніда, ніякай дапамогі яны не атрымліваюць. А жывуць на свае грошы непадалёку ад Парыжа. Малодшая дачка ходзіць у школу, а старэйшая наведвае каледж.
«Пра свой стан па справе 19 снежня я нічога не ведаю. Ды і не веру я ўладам. Займаюся цяпер сваёй легалізацыяй, удзельнічаю ў пікетах, вучу мову».
Цяпер чытаюць
Беларуска кліча на вяселле зорку «Універа», які за вайну. Упрэгся ўвесь Threads13
Каментары