Развіваць інтэрнэт будуць Вакульчык, Зайцаў, Куляшоў...

У раду па развіцці інфармацыйнага грамадства пры прэзідэнце Беларусі ўвайшло 20 чалавек. Адзіным прадстаўніком прыватнага бізнэсу абраны Андрэй Нарэйка, кіраўнік асацыяцыі «Белінфакам».

Склад рады і фармат яе працы зацверджаныя ў палажэнні, прыкладаным да ўказа прэзідэнта № 515 «Аб некаторых пытаннях развіцця інфармацыйнага грамадства ў Рэспубліцы Беларусь». Указ быў падпісаны прэзідэнтам 8 лістапада, паведамляе IT.TUT.BY.

У адсутнасць прэзідэнта (старшыня рады) дарадчым органам будуць кіраваць намеснік прэм’ера Анатоль Калінін (намеснік старшыні рады) і/або памочнік прэзідэнта Віктар Лукашэнка (намеснік старшыні рады). Сакратаром рады прызначаны Усевалад Янчэўскі — памочнік прэзідэнта, начальнік галоўнага ідэалагічнага ўпраўлення адміністрацыі прэзідэнта.

Акрамя іх у раду ўвайшлі Сяргей Абламейка (рэктар БДУ), Валерый Вакульчык (старшыня следчага камітэта), Ігар Войтаў (старшыня ДКНТ), Віктар Гумінскі (намеснік старшыні ПП НС), Сяргей Гурулёў (старшыня дзяржаўнага ВПК), Вадзім Зайцаў (старшыня КДБ), Анатоль Куляшоў (міністр унутраных справаў), Мікалай Ладуцька (старшыня Мінгарвыканкама), Сяргей Маскевіч (міністр адукацыі), Андрэй Нарэйка (кіраўнік асацыяцыі «Белінфакам»), Мікалай Панцялей (міністр сувязі і інфарматызацыі), Алег Праляскоўскі (міністр інфармацыі), Анатоль Русецкі (кіраўнік прэзідыума НАН РБ), Уладзімір Сянько (намеснік старшыні праўлення Нацбанка), Валерый Цапкала (дырэктар адміністрацыі ПВТ) і Сяргей Шпегун (начальнік ААЦ).

Сярод кіраўнікоў дзяржаўных структураў і органаў адзіным прадстаўніком прыватнага бізнэсу абраны старшыня праўлення Асацыяцыі «Белінфакам», кандыдат фізіка-матэматычных навук Андрэй Нарэйка. Яму 47 гадоў, ён працаваў дэпутатам другога склікання Палаты прадстаўнікоў Нацыянальнага Сходу Беларусі, цяпер таксама кіруе ТАА «Прафесійныя радыёсістэмы».

Рада будзе збірацца не радзей чым раз на паўгода, каб «вызначаць мэты і задачы дзяржаўнай інфармацыйнай палітыкі, метадаў і спосабаў яе рэалізацыі». Акрамя таго, рада зоймецца каардынацыяй дзейнасці дзяржаўных органаў і іншых дзяржаўных структураў у галіне развіцця інфармацыйнага грамадства ў Беларусі. Яшчэ адна задача рады — каардынаваць працу і развіццё дзяржаўнай сістэмы аказання электронных паслуг. Чальцы рады будуць абмяркоўваць меры па ўмацаванні інфармацыйнай бяспекі, інтэграцыі дзяржаўных інфармацыйных сістэм, меры дзяржпадтрымкі па развіцці інфармацыйнага грамадства ў краіне і, як вынік, фармуляваць канкрэтныя прапановы па паляпшэнні сітуацыі.

Пры радзе будзе функцыянаваць пастаянная рабочая група пад кіраўніцтвам сакратара рады — яна зоймецца падрыхтоўкай прапановаў і планаў працы кожнага з паседжанняў рады.

З інфармацыйнага і арганізацыйна-тэхнічнага боку дзейнасць рады і яго пастаяннай рабочай групы забяспечаць адміністрацыя і кіраўніцтва справамі прэзідэнта Беларусі.

Нагадаем, пасля ўтварэння рады частка экспертаў выказала меркаванне, што новая структура працягне абмяжоўваць свабоду ў інтэрнэце.

• 0
• 0
• 0
• 0
• 0
• 0
• 0
• 0