«Я ўпэўнены, што беларускамоўная вэрсія новай апэрацыйнай сыстэмы будзе неўзабаве створаная» – паведаміў на прэс‑канфэрэнцыі Валер Ланавенка, генэральны дырэктар Microsoft у Беларусі і Ўкраіне.
Стварэньне беларускамоўнай вэрсіі Windows Vista і 2007 Microsoft Offise System цалкам магчымае тэхнічна, паведаміў Валер Ланавенка. Паводле ягоных словаў, у Беларусі для гэтага дастаткова кваліфікаваных спэцыялістаў.
Пытаньне заключаецца ў попыце на такую вэрсію, і такі попыт вывучаецца. Дырэктар Microsoft у Беларусі і Ўкраіне паведаміў таксама, што беларуская Акадэмія навук выказваецца за стварэньне беларускамоўнай вэрсіі. «Наша задача палягае ў тым, каб даць беларускім карыстальнікам выбар, і я ўпэўнены, што беларускамоўная вэрсія новай апэрацыйнай сыстэмы будзе неўзабаве створаная», – зазначыў сп. Ланавенка.
А пакуль у найбліжэйшы час на беларускім рынку зьявіцца расейская вэрсія новай прадукцыі Microsoft. Плянуецца, што ў масавы продаж новая апэрацыйная сыстэма паступіць зь 1 сакавіка. Для карпаратыўных кліентаў яна даступная зь лістападу мінулага году. В. Ланавенка не пацьвердзіў інфармацыю пра затрымку прадукцыі Microsoft на беларускай мытні, аднак потым патлумачыў затрымку шырокага продажу адрозьненьнямі ў хуткасьці мытнага афармленьня.
Прадстаўнікі Microsoft у Беларусі і Ўкраіне высока ацэньваюць патэнцыял беларускага рынку. Рост прыбыткаў ад продажу прадукцыі кампаніі ў Беларусі за апошні год пераўзышлі больш чым на 50% пазамінулы паказчык. Беларускі рынак у сярэднім пераўзыходзіць па росьце продажаў іншыя нацыянальныя рынкі ўсходнеэўрапэйскага рэгіёну.
Новая апэрацыйная сыстэма прайшла беспрэцэдэнтнае па колькасьці ўдзельнікаў тэставаньне: больш за 5 мільёнаў карыстальнікаў з усяго сьвету, у тым ліку 80 тысячаў беларусаў і ўкраінцаў, карысталіся бэта‑вэрсіяй, дасылалі свае водгукі і рэкамэндацыі.
Фота Юліі Дарашкевіч
Каментары