У Магілёве адкрыта памятная дошка савецкаму кампазітару Эдуарду Калманоўскаму

3 мая ў Магілёве на доме, дзе нарадзіўся вядомы савецкі кампазітар Эдуард Калманоўскі, была ўрачыста адкрыта мемарыяльная дошка.

«Сёння, можа быць, самы ўрачысты, самы значны дзень у маім жыцці, — заявіў на цырымоніі адкрыцця дошкі сын кампазітара Сяргей Калманоўскі, які прыехаў з Германіі. — Бацька быў сапраўды народным артыстам, народным кампазітарам. Ён стаў народным задаўга да таго, як атрымаў гэта званне».

Як расказаў сын кампазітара, у канцы жыцця Эдуард Калманоўскі засмучаўся, што яго песні, як старыя, так і новыя, «не зусім упісваліся ў атмасферу мыльных папсовых тэлевізійных перадач». «Я тады спачуваў яму, а цяпер, пасля таго як мінула шмат часу, думаю: хіба раней у тэлевізійных перадачах прапагандаваліся такія песні, як „Ёсць на Волзе ўцёс“ ці „Брадзяга Байкал пераехаў“, а іх ведалі і тады, як ведаюць і цяпер, таксама будуць ведаць і ў будучыні.

Вось што я маю на ўвазе, калі кажу, што бацька сапраўдны народны кампазітар. І ў яго таксама такія ж песні, проста аўтар музыкі пакуль яшчэ вядомы», — сказаў Сяргей Калманоўскі.

На адкрыццё памятнай дошкі, якая ўстаноўлена на доме № 21 па вуліцы Першамайскай, прыйшлі прадстаўнікі ўлады, навучэнцы, члены грамадскіх арганізацый Магілёва. Прысутнічаў і аўтар працы, скульптар Андрэй Вараб’ёў.

«Для мяне гэта таксама важны дзень, таму што на адну працу стала больш, і яна — у самым цэнтры горада», — заявіў скульптар. Паводле слоў Вараб’ёва, ён разумеў, якая адказнасць ляжала на ім, калі ён працаваў над мемарыяльнай дошкай, «але працавалася натхнёна».

Ён павіншаваў прысутных з тым, што «сёння Магілёў стаў крыху лепшым».

Мемарыяльная дошка ўяўляе сабою барэльеф кампазітара, над якім напісана: «Я люблю цябе, жыццё», а ўнізе — надпіс на беларускай мове, што ў гэтым доме 9 студзеня 1923 года нарадзіўся вядомы кампазітар, народны артыст СССР Эдуард Калманоўскі.

Адкрыццё мемарыяльнай дошкі адбылося ў межах Дзён яўрэйскай культуры.

***

Эдуард Калманоўскі нарадзіўся ў сям’і Савелія Калманоўскага і Раісы Паўлоўскай. У 1945 годзе скончыў Маскоўскую дзяржаўную кансерваторыю імя П.І.Чайкоўскага па класе кампазіцыі. Адны з самых вядомых песень на музыку Калманоўскага — «Я люблю цябе, жыццё», «Алёша», «Ці хочуць рускія войны?», «Людзі ў белых халатах», «Вы служыце, мы вас пачакаем». Памёр 27 ліпеня 1994 года. Пахаваны ў Маскве на Увядзенскіх могілках.

• 0
• 0
• 0
• 0
• 0
• 0
• 0
• 0