Прэтэндэнты ў кандыдаты ў дэпутаты, падтрыманыя кампаніяй «Гавары праўду!», правялі 1 жніўня ў Мінску агульны пікет па зборы подпісаў.
На пляцоўцы каля Камароўскага рынку яны выставілі інфармацыйныя стэнды сталічных прэтэндэнтаў у кандыдаты ў дэпутаты, на якіх таксама была інфармацыя пра ўсіх 25 прэтэндэнтаў па Беларусі.«Мы паказваем, што гэта каманда, якая здольная прымаць рашэнні», — заявіў на пікеце кіраўнік выбарчага штаба «Гавары праўду!» Андрэй Дзмітрыеў.
Паводле яго слоў, пікет прысвечаны не толькі збору подпісаў і інфармаванню насельніцтва аб прэтэндэнтах у кандыдаты, але і аб падтрымцы лідара кампаніі «Гавары праўду!» Уладзіміра Некляева. «Сам Някляеў не можа браць удзел у пікетах. Гэта вельмі дзіўная сітуацыя. Ён з’яўляецца членам ініцыятыўнай групы ўсіх 25 прэтэндэнтаў у кандыдаты. Нягледзячы на гэта, рашэннем суда яму забаранілі збіраць подпісы і браць удзел у перадвыбарных пікетах. Мы хочам звярнуць увагу грамадзян на тое, што адзін з самых моцных і рэйтынгавых палітыкаў, будучы на свабодзе, рэальна абмежаваны ў сваіх правах і дзеяннях», — сказаў Дзмітрыеў.
Дадатковыя абмежаванні пры адбыванні пакарання Някляевым, які быў асуджаны за падзеі 19 снежня 2010 года, суд Ленінскага раёна наклаў на палітыка 9 верасня 2011 года. Някляеву забаронена, у прыватнасці, быць арганізатарам або ўдзельнікам масавых шэсцяў, дэманстрацый, пікетаў або іншых масавых мерапрыемстваў. Ён не можа выязджаць за межы Мінска без пісьмовага дазволу праваахоўных органаў і пакідаць межы Беларусі да заканчэння тэрміну пакарання.
Падчас пікету каля Камароўскага рынку актывісты «Гавары праўду!» правялі невялікую
скайп-канферэнцыю з Някляевым, які сказаў добрыя словы прэтэндэнтам у кандыдаты і заклікаў грамадзян падпісвацца за іх вылучэнне кандыдатамі.
Паводле слоў Дзмітрыева, пікет па зборы подпісаў будзе з’яўляцца на пляцоўцы перад Камароўскім рынкам рэгулярна, а пасля рэгістрацыі кандыдатаў у дэпутаты агітацыйны пікет будзе знаходзіцца на гэтым месцы пастаянна.
Дзмітрыеў зазначыў, што такія пікеты 1 жніўня праводзяцца ва ўсіх гарадах і ва ўсіх выбарчых акругах, дзе ёсць прэтэндэнты ў кандыдаты, падтрыманыя кампаніяй «Гавары праўду!».
Супрацоўнікі праваахоўных органаў назіралі за пікетам збоку, здымалі тое, што адбываецца, на відэакамеры, але не ўмешваліся.
Цяпер чытаюць
Што за Дзмітрый Скіндзераў, які абвясціў вайну Ціханоўскай? Супрацоўніцтва з ГУБАЗіКам, даўгі ў Беларусі, даўгі ў Літве23
Каментары