Замест помніка — плякат
Гарадзенская моладзь з Маладога Фронту пачала веснавы наступ пікетам 2 лютага, на ўгодкi Кастуся Калiноўскага
Спачатку на чыгуначным вакзале прымацавалі кветкi i бел-чырвона-белыя стужкi да памятнай шыльды, зробленай у выглядзе маленькай каплiчкi. Яе адкрылi ўвосень 1995 г. паводле рашэньня гарадзкiх уладаў, прынятага яшчэ за Шушкевiча. На вакзале ў 1863 г. адбыўся бой памiж паўстанцамi i вайсковым аддзелам.
Затым у цэнтры гораду на вул.Савецкай перад «Домам саветаў» адбыўся пiкет. Адзiн маладзён трымаў плякат: «На гэтым месцы павiнен стаяць помнiк Кастусю Калiноўскаму». Зноў жа, паводле рашэньня гарадзкiх уладаў дзесяцiгадовай даўніны. Не БНФ тады яго прыняў, а самi ўлады. Таму мiлiцыянту, які зьявiўся на пiкеце, не было за што зачапiцца. Ён толькi папрасiў школьнiка Яўгена Андрэева, якi трымаў плякат, пайсьцi зь iм у райаддзел, пераконваючы, што лепей было б арганiзаваць школьны вечар, прысьвечаны Калiноўскаму.
На Савецкай вулiцы — на iншым доме, дзе была кансьпiратыўная кватэра Калiноўскага, улады таксама хацелi прымацаваць шыльду. Але перахацелi.
Пiкет, дарэчы, адбыўся побач былой мужчынскай гiмназii, дзе вучыўся старэйшы брат Кастуся Вiктар.
Сяргей Астраўцоў
Цяпер чытаюць
Ён адкрыта называў расійскіх вайскоўцаў акупантамі, а расійскую ўладу — фашысцкай. За краты кінулі супрацоўніка МТБанка5
Каментары