Партыю «Альтэрнатыва для Германіі» падазраюць у перадачы сакрэтных звестак Маскве
Дыпламаты ЕС і некаторыя нямецкія дэпутаты выказалі сур’ёзную занепакоенасць тым, што праварадыкальная партыя «Альтэрнатыва для Германіі» (АдГ) можа перадаваць канфідэнцыйныя дакументы Еўрасаюза ў Маскву. Паводле інфармацыі Politico, доступ АдГ да базы EuDoX, дзе захоўваюцца тысячы дакументаў ЕС, у тым ліку запісы закрытых сустрэч на ўзроўні паслоў, стварае рызыку ўцечкі важнай інфармацыі.
Дэпутаты сцвярджаюць, што АдГ мае непасрэдныя сувязі з расійскім пасольствам і кантактуе з прадстаўнікамі Расіі падчас паездак у Маскву. Гэта ўключае збор даных праз парламенцкія запыты і распаўсюд расійскіх прапагандысцкіх наратываў. У прыватнасці, падазраваных цікавіць інфармацыя пра заходнія пастаўкі зброі ва Украіну, супрацьдроновую абарону, а таксама тое, што ўлады ЕС ведаюць пра дзейнасць Расіі ў Балтыйскім рэгіёне.
З-за гэтага дыпламаты ўсё часцей праводзяць закрытыя сустрэчы ў абмежаваным складзе і ўжываюць меры бяспекі для абароны сакрэтных дакументаў. Аднак сістэма EuDoX у бундэстагу адносна адкрытая — каля 5000 карыстальнікаў маюць доступ да каля 25000 дакументаў у год, у тым ліку з грыфам «абмежаванага распаўсюду». Эксперты адзначаюць, што хоць дакументы не з’яўляюцца надзвычай сакрэтнымі, шырокі доступ і магчымасць кантактаў АдГ робяць сістэму ўразлівай для ўцечак.
У адказ на гэта адміністрацыя бундэстагу прыняла меры бяспекі: частка супрацоўнікаў АдГ пазбаўлена доступу да будынкаў парламента і да ІТ-сістэм. У той жа час сама партыя АдГ адхіляе ўсе абвінавачванні і называе іх беспадстаўнымі.
ЕС адхіліў Венгрыю ад унутраных перамоў і сакрэтнай інфармацыі з-за боязі ўцечак у Расію
Кіраўнік «Альтэрнатывы для Германіі» Аліса Вайдэль заклікала да паставак нафты з Расіі
Усе гавораць пра пагрозу ультраправых у Еўропе. А цяпер у наступ пайшлі яшчэ і ультралевыя
У Германіі затрымалі дэпутата ад АдГ, на палях якога пад Лідай працавалі вязні
Каментары
Почему фсб-шная прокладка до сих пор не предана анафеме?