U Pałacy Respubliki adkryŭsia «Placoŭka-choł»: «Za nievykarystańnie biełaruskaj movy — žorstkija štrafy»
U Pałacy respubliki, što na Kastryčnickaj płoščy Miensku, u testavym režymie zapracavaŭ klub «Placoŭka-choł», aformleny ŭ biełaruskim nacyjanalnym styli.
Menedžment klubu maje namier zrabić miesca nacyjanalna-aryjentavanym, ź biełaruskamoŭnym absłuhoŭvańniem i tradycyjnaj kuchniaj, adaptavanaj da klubnaha farmatu.
«Stvarajem biełaruskaść, ale biez atmasfery sialanskaj chaty»
Choć haspadary «Placoŭka-choła» kažuć, što pakul jašče ničoha nie hatova, i vyhlad klubnaha pamiaškańnia nie adroźnivajecca ad siaredniestatystyčnaha, elementy budučaha afarmleńnia ŭžo jość. Na barnaj stojcy i pieraharodkach — stensiły ŭ vyhladzie arnamentu, na stałach — padrychtavanyja plakaty, jakimi azdobiać ścieny, na dźviarach prybiralniaŭ — nadpisy «Spadar» i «Spadarynia». Całkam afarmleńnie budzie zavieršana pad Novy hod.
«My pracujem z dyzajnerami, vyrašajem, kudy nanieści nacyjanalnaje hrafici, plakaty, pałotny z arnamentami. Źbirajem detali pa častkach, kab atrymałasia cełasnaja nacyjanalnaja kancepcyja. Jašče jeździm pa vioskach, źbirajem łamačča — kalosy, krosny, kałaŭroty, inšyja bytavyja rečy. Ale my nia budziem stvarać tut iluziju sialanskaj chaty, usie hetyja rečy my jarka rasfarbujem, spałučyŭšy takim čynam nacyjanalnyja zdabytki i sučasnyja tendencyi. My chočam uziać sučasnuju «dźvižuchu» i pieravieści jaje ŭ biełaruski farmat», — adznačajuć u «Placoŭka-chole».
«Hałoŭnaja meta — prasoŭvańnie nacyjanalnaha praduktu»
«Placoŭka-choł» — zabaŭlalnaja ŭstanova, meta jakoj — prasunuć biełaruski pradukt. Heta placoŭka dla realizacyi moładzi. Ciapier, naprykład, klub supracoŭničaje ź Instytutam kultury — tam šmat muzykaŭ, tancoraŭ, mastakoŭ, jakija mohuć zarabić hrošy, zajavić pra siabie, vystupajučy mienavita ŭ «Placoŭka-chole». Dźviery klubu adčynienyja dla ŭsich, ale ž kryteram dla supracoŭnictva budzie nacyjanalny składnik.
«Babka i draniki ŭ klubnym farmacie»
Jak u lubym klubie, u «Placoŭka-chole» možna budzie vypić i zakusić. U jakaści mocnych napojaŭ haściam prapanujuć samahonku «PieršačOK», harełku «Svajak» i «Siabry». Pajeści možna budzie tradycyjnych dranikaŭ z roznymi dadatkami, babku i stravy ŭ harščočkach. Padavacca ŭsio budzie chutka, u vyhladzie klubnaj zakuski.
«My pieršaprachodcy. Nikoli nie było biełaruskaha klubu. Tak, jość «Tałaka», «Kamianica», ale heta kaviarni, kudy iduć pa ježu i dzie strava moža hatavacca chvilin 30–40. U nas zusim inšy farmat. «Placoŭka-choł» — nie dla najedku. Tamu meniu my adaptavali pad klubny farmat — draniki i babki buduć padavacca vielmi chutka, jak heta pryniata ŭ takich ustanovach», — adznačajuć haspadary.
«Jak stvaryć biełaruski dens-miks?»
Adzin z vyklikaŭ, jakija stajać pierad stvaralnikami biełaruskaha načnoha klubu, — vybar muzyki. Dydžei łamajuć hałavu nad tym, jak prapanavać naviednikam muzyku, jakaja budzie biełaruskaj i dyskatečnaj:
«Na žal, niama jakasnaj biełaruskaj klubnaj muzyki. Tak, jość folk — ale pad jaho składana ruchacca, dyj heta davoli specyfičnaja muzyka. Ciapier dydžei robiać dla nas tancavalnyja miksy, pad jakija buduć tancavać naviedniki. I heta składana. Tamu što vielmi mała jakasnych biełaruskich trekaŭ, jakija možna vykarystoŭvać. Tamu ŭ tancavalnaj prahramie my planujem vykarystoŭvać i anhłamoŭnyja kampazycyi. Rasiejskamoŭnyja buduć hučać tolki ŭ tym vypadku, kali jany vykonvajucca biełaruskim śpievakom. Jašče jość ideja pierakładać rasiejski tekst na biełaruskuju movu. U nas buduć vakalisty, jakija zmohuć śpiavać takija pierakłady, całkam zapaŭniajučy tancavalnuju prahramu», — kažuć u «Placoŭka-chole».
Arhanizatary bačać tut nia tolki rok, ale i pop-kancerty. «Biełaruskaja papsa, ščyra zaprašajem. I Darafiejeva, i Chlastoŭ, budziem rady. Ale buduć i inšyja muzyčnyja styli. Hałoŭnaje, kab heta było naša, biełaruskaje».
«Za nievykarystańnie biełaruskaj movy — žorstkija štrafy»
Planujecca, što ŭvieś persanał — achoŭniki, administratary, aficyjanty — budzie razmaŭlać pa-biełarusku. Kali «Placoŭka-choł» šukaŭ supracoŭnikaŭ, to vałodańnie biełaruskaj movaj było hałoŭnym patrabavańniem.
«Za nievykanańnie hetaj umovy ŭ klubie buduć vielmi žorstka štrafavać. Užo ciapier viadziecca praca z persanałam, hałoŭnaje patrabavańnie — vałodańnie biełaruskaj movaj. Meniu, zrazumieła, budzie taksama pa-biełarusku, ale tam buduć jašče anhielskaja i rasiejskaja movy, bo siarod haściej u klubie čakajuć i zamiežnikaŭ. Nu, i zrazumieła, što ŭvieś persanał budzie pracavać u vyšyvankach».
«Na stvareńnie nacyjanalnaha načnoha klubu natchniŭ Lvoŭ»
Kreatyŭnaja hrupa «Placoŭka-choła» nie chavaje, što čerpaje natchnieńnie ŭ kreatyŭnaj atmasfery lvoŭskich kaviarniaŭ i klubaŭ:
«My zachaplajemsia tym, jak u Lvovie kaviarni i kluby za košt admysłovaj atmasfery stanoviacca kultavymi miescami. U ich vielmi šmat klasnych art-abjektaŭ, jakija stvarajuć maładyja dyzajnery, mastaki vuličnaha farmatu. U takich miescach chočacca fatahrafavacca, tudy chočacca jechać znoŭ i znoŭ. Tam umiejuć zrabić tak, kab heta vyhladała smačna. Persanał tam nia tolki dla taho, kab prynieści ježu i zabrać apłatu — tam aficyjanty chutčej nahadvajuć teatralnych artystaŭ, jakija ciabie sustrakajuć, i ty adrazu traplaješ usiaredzinu zachaplalnaha performansa. I heta nasamreč kruta. I heta toje, što my imkniomsia stvaryć u Miensku».
Pamior palitviazień Valancin Štermier. «Ledź chadziŭ paśla insultu — a jaho kinuli ŭ ŠIZA»7
Kamientary