«Ministerstvam dziaržbiaśpieki ŁNR padčas metanakiravanaj pracy pa supraćdziejańni dziejnaści zamiežnych radykalnych hrupovak, jakija pad kantrolem śpiecsłužbaŭ zajmajucca prapahandaj ideałohii krajniaha nacyjanalizmu, raspalvajuć mižnacyjanalnuju varožaść i ažyćciaŭlajuć vyviedvalnyja apieracyi na terytoryi respubliki, vyjaŭlena hrupa fanataŭ futbolnaha kłuba «Zara» «Ultras Čorno-bili», — paviedamili ŭ śpiecsłužbie ŁNR.
Na dadzieny momant zatrymanyja dźvie asoby — 20-hadovy Uładzisłaŭ Aŭčarenka i 19-hadovy Arciom Achmieraŭ. Suprać ich raspačata kryminalnaja sprava pa artykule «dziaržaŭnaja zdrada ŭ formie špijanažu».
«U chodzie śledčych dziejańniaŭ užo vyjaŭlenyja fakty viarboŭki hramadzian Aŭčarenki i Achmierava supracoŭnikam hałoŭnaha ŭpraŭleńnia raźviedki Ministerstva abarony Ukrainy z pazyŭnym «Vialiki i zły» i pieradačy infarmacyi, jakaja składaje dziaržaŭnuju tajnu, a taksama zachoŭvańnia simvoliki bataljona «Azoŭ», «Pravaha siektara», futbolnaha kłuba «Zara», raspaŭsiudžvańnia imi nieanacysckaj litaratury i ŭlotak z zaklikami da źviaržeńnia kanstytucyjnaha ładu respubliki», — havorycca ŭ zajavie MHB «ŁNR».
MHB maje šyroki śpiektr pretenzij da fanataŭ: «U ciapierašni čas pravodziacca pravierki na mahčymaje dačynieńnie členaŭ hrupoŭki da karektavańnia artyleryjskaha ahniu pa Łuhansku ŭ 2015 hodzie, da masavych zabojstvaŭ na Majdanie ŭ Kijevie, u adeskim Domie prafsajuzaŭ, da pravakacyj i napadaŭ na aktyvistaŭ padčas praviadzieńnia refierendumu ab niezaležnaści ŁNR».
«Łuhanskaj narodnaj respublikaj» byli abvieščanyja tyja terytoryi Łuhanskaj vobłaści Ukrainy, jakija byli zaniatyja rasijskimi siłami ŭ 2014 hodzie.
Futbolny kłub «Zara» praciahvaje vystupać u čempijanacie Ukrainy. Ad času akupacyi Łuhanska jon pravodzić matčy ŭ Zaparožžy. U čempijanacie zajmaje druhoje miesca paśla danieckaha «Šachciora», jaki ad 2014 hoda pravodzić chatnija matčy ŭ Lvovie.
Futbolnyja fanaty «Zary» i danieckaha «Šachciora» ŭdzielničali ŭ pratestach suprać rasijskaha ŭvarvańnia ŭ Krym i Danbas.
Staronki ultras u sacsietkach paviedamlajuć, što ŭ fanataŭ u Łuhansku vyjavili ŭkrainskija ściahi i praŭkrainskija ŭlotki.
Ciapier čytajuć
Babaryka try chviliny adkazvaŭ na pytańnie, čyj Krym. Tak i nie adkazaŭ130
Kamientary