Abituryjenty pravalili centralizavanaje testavańnie

Padvodziacca vyniki centralizavanaha testavańnia. Pa rasiejskaj movie 41,7% abituryjentaŭ nabrali mienš za 20 bałaŭ, pa biełaruskaj — 27%, tamu Ministerstva adukacyi vymušana było padčas ustupnaj kampanii terminova pierahledzieć škału bałaŭ.

28 červienia abituryjenty zdavali apošni test pa chimii. Pa piaci pradmietach pracy abituryjentaŭ užo pravieranyja (pa biełaruskaj i rasiejskaj movach, historyi Biełarusi, usiaśvietnaj historyi, matematycy).

Pavodle praviłaŭ, kali abituryjent na centralizavanym testavańni nabiraje pa pradmiecie mienš za 20 bałaŭ, jon nia moža pastupać u VNU. Sioletnija vyniki centralizavanaha testavańnia niesuciašalnyja — tak acaniŭ ich adkazny sakratar Dziaržaŭnaj kamisii pa kantroli za chodam padrychtoŭki i praviadzieńniem ustupnych ispytaŭ Valer Aŭsiańnikaŭ. Asabliva ŭražvajuć vyniki pa movach i matematycy: bolš za 40% atrymali mienš za 20 bałaŭ sa sta mahčymych pa rasiejskaj movie, 27% — pa biełaruskaj, bolš za 30% faktyčna pravalili matematyku.

Tamu dziaržaŭnaja kamisija vymušana była pierahledzieć tak zvanuju škału bałaŭ, kaža Valer Aŭsiańnikaŭ:

«Vielmi šmat zdali na bał, nižejšy za 20, albo naahuł nie zdali. Tamu my vymušany byli niejak vychodzić z takoj składanaj sytuacyi. Kožny pradmiet ciapier budzie aceńvacca svajoj minimalnaj škałoj».

Minimalnaja škała — heta minimalny bał, na jaki napisali 10% abituryjentaŭ. Pa biełaruskaj i rasiejskaj movach sioleta minimalnaja škała vyznačana ŭ 13 bałaŭ. Ale heta vyrašana litaralna siońnia. A na minułym tydni šmat abituryjentaŭ, daviedaŭšysia pra takija vyniki, nie pryjšli na testavańnie pa inšych pradmietach: tak, na chimiju nie źjavilisia bolš za paŭtary tysiačy zarehistravanych na CT. Tłumačeńnie Valera Aŭsiańnikava:

«Niesuciašalnyja, vyniki, tak. Ale siońnia jość jašče mahčymaść u abituryjentaŭ prajści testavańnie, ale nie pa biełaruskaj i rasiejskaj movach, a pa tych pradmietach, na jakija jany nie pajšli: bijalohija, zamiežnyja movy, chimija. Jany mohuć zdać hetyja dyscypliny ŭ rezervovy dzień, 2 lipienia. Ale my siońnia nie nazirajem ažyjatažu na rezervovy dzień».

Vielmi šmat zdali na bał, nižejšy za 20, albo naahuł nie zdali

Čamu tak adbyłosia? Čamu takija prykryja vyniki? Nastaŭnica rasiejskaj movy Śviatłana Damkovič kaža:

«My, nastaŭniki, nie čakali nadta vysokich vynikaŭ. Ale kab nastolki kiepska… A ź inšaha boku, čaho było čakać? Hadziny na vyvučeńnie movaŭ usio skaračajucca: kali ŭ 5—6 klasach jašče pa 3 hadziny na tydzień, u 10—11 — pa adnoj hadzinie. Heta mizer. Na zamacavańnie materyjału času amal niama. Viedy ŭ vučniaŭ paviarchoŭnyja. Voś tamu taki i vynik».

Hutaru z Valeram Aŭsiańnikavym, jaki ačolvaje Departament jakaści adukacyi:

Karespandentka: «Pra što heta śviedčyć? Što dzieci drenna viedajuć, što nastaŭniki drenna vučać, ci što testy składanyja?»

«Dla taho kab razabracca, u čym asnoŭnaja pryčyna, treba pravieści admysłovaje daśledavańnie, analiz. Ale jość, napeŭna, krychu i adnaho, i druhoha, dyj testy taksama byli praźmierna składanyja».

My, nastaŭniki, nie čakali nadta vysokich vynikaŭ. Ale kab nastolki kiepska…

Nastaŭnica rasiejskaj movy Śviatłana Damkovič kaža:

«Ja nie mahu skazać, što testy nie adpaviadajuć školnaj prahramie. Tam, u pryncypie, usio, što prachodziać — ja kažu tolki za rasiejskuju movu. Jany nia toje što stali składaniejšyja — ich uskładnili pa struktury. I asabliva tak zvanyja pytańni‑pastki: pamyłka, dapuščanaja ŭ adnym słovie ŭ šerahu, ci pamyłka — u dvuch słovach šerahu… Uskładnili mienavita strukturu».

«Navat kali testy zavyšanaj składanaści, usio adno jany adnolkavyja dla ŭsich. Ale heta nie adznaka školnaja, a rejtynhavaja adznaka ahulnaj masy abituryjentaŭ. Tak što, mahčyma, pry pastupleńni budzie krychu nižejšy prachadny bał, čym letaś. To bok składanaściaŭ dadatkovych nie ŭźnikaje».

Možna šmat spračacca, nakolki abjektyŭna testami možna acanić jakaść viedaŭ. Ale jasna adno: čynoŭnikam ad adukacyi, nastaŭnikam daviadziecca surjozna praanalizavać, čamu tak šmat vučniaŭ, pa sutnaści, prademanstravali vielmi nizkija viedy.

Ina Studzinskaja, Radyjo Svaboda

• 0
• 0
• 0
• 0
• 0
• 0
• 0
• 0