U Mieksicy znajšli najbujniejšuju ŭ śviecie piačoru daŭžynioj 347 kiłamietraŭ
Hrupa daśledčykaŭ vyjaviła ŭ rajonie mieksikanskaha štata Kintana-Roa najbujniejšuju ŭ śviecie zatoplenuju piačoru, praciahłaść jakoj składaje ažno 347 kiłamietraŭ, paviedamlaje Reuters.
Hetaje adkryćcio stała mahčymym dziakujučy pracy daśledčykaŭ, jakija 10 studzienia zdoleli źviazać dźvie bujnyja zatoplenyja piačornyja sistemy — Sak-Aktun i Dos Ochos, raźmieščanyja na poŭnačy paŭvostrava Jukatan ŭ vakolicach horada Tułum.
Raniej rekord naležaŭ raźmieščanaj na poŭdzień ad Tułum padvodnaj piačory Oks-Biel-Cha, praciahłaść jakoj składaje 270 kiłamietraŭ.
Pavodle normaŭ śpieleałohii, kali dźvie piačornyja sistemy złučajucca, bujniejšaja ź ich pahłynaje drabniejšuju, pry hetym nazva apošniaj źnikaje. Ź dźviuch abjadnanych na minułym tydni piačor najbolšaja płošča naležyć Sak-Aktun, tamu paśla abjadnańnia novaja piačornaja sistema zachavaje hetuju nazvu, adpaviedna, nazva Dos Ochos pierastanie isnavać.
«Hetaja vielizarnaja piačora ŭjaŭlaje saboj samy važny padvodny archieałahičny abjekt u śviecie, bo tam bolš za sotniu archieałahičnych kantekstaŭ, siarod jakich ślady pieršych pasialencaŭ Amieryki, takija jak źnikłaja faŭna i, viadoma, kultura Maja», — zajaviŭ dyrektar daśledčaha prajektu Gran Acuífero Maya Hiljerma de Anda.
Ciapier metaj navukoŭcaŭ jość pošuk złučeńnia piačory Sak-Aktun z tryma inšymi piačorami, raźmieščanymi niepadalok.
Kamientary