U Rasii apublikavany śpis bajcoŭ, što «prapali bieź viestak» pad Chišamam u Siryi. U im 74 proźviščy
Rasijskija błohiery i niezaležnyja žurnalisty praciahvajuć pa drabkach źbirać infarmacyju pra boj pad Chišamam u Siryi. Tam 7 lutaha rasijskija siły i siryjcy sprabavali zaniać naftavaje radovišča, jakoje kantralavali kurdskija apałčency, sajuźniki ZŠA. U vyniku amierykancy nanieśli avijaŭdar pa nastupoŭcach.
Dakładnych źviestak pra ličbu achviar pakul niama, ale sa śviedčańniaŭ tych, chto vyžyŭ, paŭstaje karcina poŭnaha razhromu.
Viadomy rasijski błohier El-Murid, jaki piša pra vojska i siryjskuju kampaniju, 17 lutaha apublikavaŭ śpis bajcoŭ, prypisanych da «pryvatnaj vajskovaj kampanii Vahniera», jakija źnikli bieź viestak paśla taho boju — heta značyć, ich niama ni siarod paranienych, ni siarod evakuiravanych zabitych. U śpisie 74 proźviščy.
«Pryvatnaja vajskovaja kampanija Vahniera» — heta farmalna pryvatnaja struktura, jakaja vykonvaje zadačy, jakija Maskva ź mierkavańniaŭ reputacyi nie choča daviarać aficyjnaj armii. U pryvatnaści, jaje bajcy ŭdzielničali ŭ zachopie Kryma i Danbasa i apieracyjach u Siryi.
Pavodle padlikaŭ niezaležnych žurnalistaŭ, ahułam u bajach u Siryi zahinuła ŭžo bolš za 600 rasijskich hramadzian.
Aficyjna Maskva paviedamlała pra hibiel niekalkich dziasiatkaŭ svaich vajskoŭcaŭ.
Kanał WarGonzo apublikavaŭ niekalki aŭdyjazapisaŭ, na jakich rasijskija vajskoŭcy raspaviadajuć ab tym, što zdaryłasia. U aŭdyja šmat łajanki, dasłoŭna rasšyfravać ich niemahčyma, ale ŭ cełym havorka idzie pra toje, što pry niejkim sutyknieńni ŭ Siryi zahinuli bolš za 200 čałaviek.
«Byli pindosy [amierykancy] … Spačatku artoj [artyleryjaj] nakryli, potym padniali čatyry viartuški [viertaloty] i ŭ karusiel zapuścili z bujnakalibiernych kulamiotaŭ… U našych, akramia aŭtamataŭ, ničoha nie było. Naohuł zładzili tam piekła. Pindosy peŭna i dakładna viedali, što heta my idziom, ruskija, voś našy išli zavod adciskać, a jany na hetym zavodzie siadzieli… Vielmi šmat chto źnik bieź viestak».
Pres-sakratar Uładzimira Pucina Dźmitryj Piaskoŭ u adkaz na prośbu žurnalistaŭ prakamientavać infarmacyju pra hibiel u Siryi 600 rasijskich bajcoŭ, zajaviŭ, što ŭ Kramli nie majuć źviestak pra rasijan, jakija mohuć znachodzicca ŭ Siryi, akramia vajennych uzbrojenych sił RF, i parekamiendavaŭ źviartacca pa hetuju infarmacyjaju ŭ Ministerstva abarony.
«My nie majem kankretnaj detalovaj infarmacyjaj, jakaja b dazvalała rabić niejkija vysnovy. Nielha vyklučać, što na terytoryi Siryi mohuć znachodzicca hramadzianie Rasijskaj Fiederacyi. Jany nie adnosiacca da Uzbrojenych sił. Heta ŭsio, što možna kanstatavać. Ale ŭ lubym vypadku heta našy hramadzianie, jany zastajucca hramadzianami Rasijskaj Fiederacyi», — skazaŭ Piaskoŭ žurnalistam u sieradu 14 lutaha.
Ciapier čytajuć
Babaryka try chviliny adkazvaŭ na pytańnie, čyj Krym. Tak i nie adkazaŭ89
Kamientary