Prasłaŭlenaha treniera biełaruskich frystajlistaŭ Mikałaja Kazieku pazbavili prezidenckaj stypiendyi i patrabujuć viarnuć hrošy
Adzin z samych pavažanych i tytułavanych trenieraŭ Biełarusi pazbaŭleny imiannoj prezidenckaj stypiendyi. Akramia taho, ź jaho ŭ dasudovym paradku spahaniajuć srodki za administracyjnaje pravaparušeńnie. Dakumient ab hetym patrapiŭ u rasparadžeńnie redakcyi sport.tut.by.
U dakumiencie RCAP pa frystajle za podpisam dyrektara paviedamlajecca, što Mikałaj Kazieka pazbaŭleny imiannoj stypiendyi prezidenta. Akramia taho, ź jaho spahaniajuć srodki, vypłačanyja «ŭ pieryjad z 13.07.2019 pa 02.06.2020» (pa administracyjnym spahnańni).
U liście jamu prapanujuć viarnuć hetyja hrošy ŭ dobraachvotnym dasudovym paradku.
U RCAP pa frystajle nam paćvierdzili sapraŭdnaść dakumienta, a taksama skazali, što 16 vieraśnia (učora) Kazieka byŭ aznajomleny ź im.
Na dakumiencie jość kamientar za jaho podpisam: «źviarnuŭsia da ministra ź listom-zvarotam za tłumačeńniem ab sutnaści pretenzij pa viartańni atrymanych srodkaŭ».
Mikałaj Kazieka ŭ kancy žniŭnia asudziŭ hvałt paśla vybaraŭ u Biełarusi.
«Ludzi vyjšli na vulicy, kab skazać svajo mierkavańnie z nahody vynikaŭ vybaraŭ, jany chacieli vykazać svaju niezadavolenaść. Ludzi vychodzili na mirnyja akcyi. Ale, ščyra, ja nie čakaŭ, što ŭ dačynieńni da hramadzian rušyć uśled takaja žorstkaja reakcyja. Baluča. Zrazumiejcie, pravieryć, razabracca va ŭsioj niespraviadlivaści [vybaraŭ] byŭ čas, była mahčymaść, ale druhi bok vyrašyŭ prosta zadušyć pratesty — heta niapravilna, heta biesčałaviečna. Nie ŭ našaj krainie tak rabić. Tym bolš pratesty ludziej, jak ciapier vyśviatlajecca, mieli pad saboj realnyja padstavy. Bo my bačym, što na vybarach byli padrobki», — skazaŭ tady jon.
Mikałaj Kazieka —adzin z najlepšych trenieraŭ u biełaruskim sporcie. Jaho vučni-frystajlisty prynieśli Biełarusi čatyry zołata, adno srebra i dźvie bronzy na Alimpijskich hulniach. Sam ža Kazieka źjaŭlajecca poŭnym kavaleram ordena Ajčyny, maje orden Pašany i miedal «Za pracoŭnyja zasłuhi».
Trenier frystajlistaŭ Kazieka prahałasavaŭ za Łukašenku, a ciapier źmianiŭ pazicyju: Narod pieramoža
Ciapier čytajuć
Na aŭtašou ŭ Lidzie ledź nie zahinuŭ adzin z samych znakamitych kaskadzioraŭ Biełarusi — jaho videa sabrali amal paŭmiljarda prahladaŭ. Što ź im ciapier?88
Kamientary