Dobraachvotnik «Janki»: Płan pa siłavym vyzvaleńni Biełarusi — kazačny zamak. Dla hetaha treba 250 tysiač bajcoŭ
Bajec Biełaruskaha dobraachvotnickaha korpusa Ihar «Janki» Jankoŭ u vypusku kanała «Žyćcio-malina» parazvažaŭ pra rasijskuju armiju, biełaruskija vajskovyja farmavańni va Ukrainie i płany pa vyzvaleńni Biełarusi. A taksama raskazaŭ pra svoj zarobak i zbroju, jakuju zaŭsiody nosić z saboj.
Pra rasijskuju i biełaruskuju armii
Ihar «Janki» Jankoŭ adznačaje, što ŭ jaho padraździaleńni nikoli nie niedaaceńvali voraha.
«Zaŭsiody da spravy treba padychodzić z chałodnaj hałavoj. Treba razumieć, što heta Rasija, a nie niejki łapik ziamli na karcie. Heta ahramadnyja resursy i vialikaja kolkaść ludziej».
Jankoŭ zhadvaje, što najbolš vysoki ŭzrovień prafiesijanalizmu siarod tych rasijskich vajskoŭcaŭ, ź jakimi jaho padraździaleńniu daviałosia sutyknucca, byŭ u vajskoŭcaŭ z HRU i FSB Rasii.
«Na samaj spravie niama aznačeńnia dobraha ci drennaha sałdata. Ty idzieš vykonvać zadaču. Adpaviedna čałaviek na tym baku — tvoj vorah. Ty nie budzieš jaho niejak aceńvać. Ty pavinien u jaho vystralić. Acenka prychodzić pa ŭsioj zadačy paśla jaje vykanańnia», — vykazvaje svajo mierkavańnie vajar.
Adnosna biełaruskaj armii ŭ Ihara niama kankretnaha mierkavańnia. Jon spasyłajecca na bajcoŭ svajho padraździaleńnia, jakija prachodzili słužbu ŭ biełaruskaj armii. «Janki» adznačaje vysokuju padrychtoŭku hetych ludziej:
«Chłopcy vielmi razumnyja i sapraŭdnyja śpiecyjalisty ŭ vajennaj spravie. Ale hety ich patencyjał raskryŭsia mienavita padčas vajny va Ukrainie. U biełarusaŭ niama dośviedu i praktyki. U ich jość tolki palihony i vučeńni. Kali ty paśla ich traplaješ u sapraŭdnuju bajavuju situacyju, to tvoj navyk chutka padaje».
Na pohlad Jankova, Łukašenka ciapier sprabuje ŭsiedzieć na dvuch kresłach i nie puścić svaju armiju na front, bo ŭsie siłaviki zjaŭlajucca «jaho asabistaj krepaściu, asabistaj achovaj». Ale ŭ toj ža čas zastajucca kamandziry, jakija prymušajuć sałdat stryhčy travu ci farbavać jaje.
Pra Biełaruski dobraachvotnicki korpus i połk Kalinoŭskaha
Ihar «Janki» adznačaje, što Biełaruski dobraachvotnicki korpus (BDK), u jakim jon słužyć, stvaraŭsia dla taho, kab abjadnać usich chłopcaŭ, jakija pachodziać ź Biełarusi i majuć bajavy dośvied. Korpus stvorany dla dapamohi ŭkraincam.
Bajec padkreślivaje, što ŭ BDK niama pytańniaŭ da dyscypliny.
«U korpusie sabralisia tyja, chto ŭžo maje dośvied. U nas jość padraździaleńnie «Teror», jakoje ŭvachodziła ŭ połk Kalinoŭskaha. Jano ŭ poŭnym składzie pierajšło da nas. Heta chłopcy z ahramadnym bajavym dośviedam».
Adnosna pałka Kalinoŭskaha Jankoŭ zaŭvažaje, što pa hetym vajennym farmavańni «jość šmat pytańniaŭ». Ale jon nie pahadžajecca ich ahučyć, bo nie choča, kab jaho słovy pasłužyli padstavaju dla kanfliktu.
«Adnosna bajcoŭ, što vajujuć, u mianie pytańniaŭ niama. Jany jość kankretna da štaba, jaki byŭ. Ciapier, jak ja viedaju, u ich niešta źmianiłasia».
Navošta biełarusu vajavać za Ukrainu i kolki treba bajcoŭ, kab vyzvalić Biełaruś
Matyvacyju biełarusaŭ vajavać za Ukrainu Ihar Jankoŭ tłumačyć tym, što Ukraina chiba adziny sajuźnik, jaki moža dapamahčy ŭ źviaržeńni Łukašenki.
«Choć dla mianie heta i niejkija kazačnyja zamki ab tym, što niešta niekali budzie. Heta atrymańnie bajavoha dośviedu ŭ vypadku, kali niešta ŭ Biełarusi adbudziecca. I heta dapamoha našym bratam», — vykazvaje svajo mierkavańnie bajec.
Jankoŭ adznačaje, što ciapier na terytoryi Biełarusi niemahčymy nijakija dyviersii z terytoryi Ukrainy. «Hetaja terytoryja znachodzicca pad zabaronaju, choć ź jaje i laciać rakiety. Tamu mulka ab tym, što jany zaraz zojduć ź pikapami i kulamiotami, zjaŭlajecca łuchtoju».
Na pohlad bajca, dla taho, kab zachod dobraachvotnych biełaruskich farmavańniaŭ na terytoryju Biełarusi byŭ paśpiachovym, nieabchodna istotnaja kolkaść ludziej, jakija pryjeduć spačatku va Ukrainu, projduć tam navučańnie i nabuduć dośvied. Takich ludziej, na pohlad «Janki», treba kala 250 tysiač.
Płany pra pachod na Biełaruś bajec nazyvaje pakul «kazačnym zamkam».
«Ciapier my tut zmahajemsia z rasijskimi vojskami. Nieabchodna tut zabrać nazad usie terytoryi. Niešta zrabić ź ich terytoryjaj, kab praduchilić na budučaje ahresiju. Tamu ciapier ja vajuju za Ukrainu», — tłumačyć svaju pazicyju Ihar Jankoŭ.
Čamu «Janki» chodzić pastajanna sa zbrojaj
Siabie Jankoŭ nazyvaje «małpaj sa zbrojaj», bo ličyć, što jaho bajavyja navyki niedastatkova dobryja. Bajec nikoli nie rasstajecca ź pistaletam «Hłok 17».
«Heta maja tabielnaja zbroja. Ciapier idzie vajna. My razumiejem, u jakoj krainie žyviom i jak pracujuć usialakija śpiecsłužby i hetak dalej. U niejkim momancie ty pavinien siabie źbierahčy ad niebiaśpieki».
Kali bajec śpić, to pistalet znachodzicca pobač. «Mnie tak spakajniej. Kab nie pistalet, to ja, mahčyma, z hłuzdu zjechaŭ by», — kaža «Janki».
Kolki zarablaje biełarus na vajnie
«Janki» adznačaje, što ŭ siarednim bajec BDK zarablaje kala tysiačy dalaraŭ. Jość bajavyja i premijalnyja vypłaty.
Bajcy hrupy, u jakuju ŭvachodzić Jankoŭ, pamiž saboju damovilisia, što kožny miesiac pakidajuć sabie peŭnuju sumu, a ŭsio astatniaje addajuć na supolnyja patreby. Srodki iduć na ramont i zapraŭku mašyn, apłatu žytła, nabyćcio pravizii. Na heta idzie prykładna pałova zarobku.
«U nas jość mašyny, jakija my sami ramantujem. I zapraŭka bolšaści mašyn adbyvajecca za naš košt», — raspaviadaje Jankoŭ.
Bajec pahadžajecca, što jaho zarobak nievialiki, ale jon nie vajuje dziela hrošaj. «Ja nie dumaju, što va Ukrainie jość ludzi, jakija pryjšli siudy vajavać za hrošy».
Ihar zhadvaje, što da vajny jaho zarobak składaŭ tuju ž tysiaču dalaraŭ. Tolki ciapier jaho mohuć jašče i zabić. Da hetaha jon stavicca pa-fiłasofsku:
«Kali zabjuć, to atrymlivajecca, što nie pašancavała. Budzie supierpryjemnaje ździŭleńnie, kali my dojdziem žyvymi da kanca».
Vajar miarkuje, što vajna moža ciahnucca bolš za 10 hadoŭ.
Čytajcie jašče:
U hučnaj apieracyi na terytoryi Rasii, mahčyma, udzielničaŭ biełaruski dobraachvotnik «Janki»
U KDB raskazali, dzie rychtujuć dobraachvotnikaŭ dla vyzvaleńnia Biełarusi
Što viadoma pra novuju biełaruskuju vajskovuju čaść va Ukrainie
Kamientary