Padčas raskopak u Połacku znajšli staražytnaje hrafici i frahmient halerei XII stahodździa
Sumiesnaja ekśpiedycyja Połackaha dziaržaŭnaha ŭniviersiteta imia Jeŭfrasińni Połackaj i Dziaržaŭnaha Ermitaža ŭ Sankt-Pieciarburhu zaviaršyła palavyja raboty na terytoryi byłoha Barysahlebskaha Bielčyckaha manastyra, a taksama kala Safijskaha sabora, paviedamlaje BiełTA.
Na terytoryi staražytnaha manastyra navukoŭcy ŭdakładnili miescaznachodžańnie Piatnickaj carkvy, jakaja zachoŭvałasia da XX stahodździa, ale była mocna paškodžanaja ŭ 1920‑ia hady i całkam razabranaja ŭ 1930-ja. Ad samoha chrama ciapier zastalisia pieravažna ślady padmurka. Archieołahi vyjavili frahmient cahlanaj ściany pachavalnaj krypty XVIII stahodździa — kala 40 santymietraŭ u vyšyniu i prykładna 4 mietry ŭ daŭžyniu.
Siarod znachodak taksama akazalisia staražytnyja budaŭničyja materyjały, u tym liku plinfy — tonkija cahliny, jakija vykarystoŭvalisia ŭ staražytnym budaŭnictvie.
Asablivuju cikavaść vyklikali kavałki tynkoŭki z pradrapanym hrafici. Pavodle papiaredniaj acenki, nadpis moža datavacca XVI stahodździem. Na im, vierahodna, paznačana imia «Ivaška».
Akramia taho, archieołahi znajšli manietnyja materyjały i zafiksavali pachavańni na haradskich mohiłkach XIV—XVI stahodździaŭ.
Nie mienš značnyja vyniki atrymanyja padčas raskopak kala Safijskaha sabora. Tam daśledčyki vyjavili frahmienty dźviuch ścien XII stahodździa. Jany źjaŭlalisia častkaj halerej — prybudoŭ da staražytnaha sabora, jakija atačali jaho z roznych bakoŭ. Takija halerei mahli vykarystoŭvacca, u pryvatnaści, dla raźmiaščeńnia biblijateki abo dla pachavańniaŭ.
Adna sa znojdzienych ścien była viadomaja daśledčykam i čakałasia padčas raskopak, a druhuju, raźmieščanuju krychu dalej na poŭnač, archieołahi vyjavili ŭpieršyniu. Ścieny składzienyja ŭ technicy «ŭtoplenaha šerahu» i zachavalisia prykładna na paŭmietra ŭ vyšyniu.
Ciapier usie znachodki i atrymanyja padčas ekśpiedycyi materyjały navukoŭcam jašče treba sistematyzavać i vyvučyć. Archieałahičnyja daśledavańni ŭ Połacku płanujuć praciahnuć i ŭ nastupnym hodzie.
U Hrodnie archieołahi znajšli frahmienty kaścioła kanca XVI — siaredziny XVII stahodździa
Da jubileju Minska składuć archieałahičnuju kartu horada
Miesca, dzie pačynaŭsia stary Miensk, buduć zabudoŭvać. Užo jość płan
Nakolki bolš pomnikaŭ architektury achoŭvajecca ŭ Polščy i Litvie ŭ paraŭnańni ź Biełaruśsiu. Žachlivyja ličby
Na Słonimščynie školniki znajšli 500 artefaktaŭ i manietu XVII stahodździa
Kamientary