Čornaje mora stała samym śmiertanosnym sudnachodnym maršrutam u śviecie

Spačatku ŭkrainskija drony pačali atakavać rasijskija sudny, party i naftavyja terminały, parušajučy marskija šlachi Rasii. Zatym rasijskija abstreły faktyčna vycisnuli karabli z partoŭ Adesy. Akramia taho, Rasija pačała atakavać bieśpiłotnikami sudny kala ŭźbiarežžaŭ krain NATA — Rumynii i Bałharyi.

Pavodle źviestak kampanii Ambrey, jakaja zajmajecca pytańniami marskoj biaśpieki, sioleta ŭ Čornym mory adbyłosia bolš za 300 napadaŭ. U vyniku zahinuli bolš za 30 marakoŭ, jašče bolš za 20 ličacca źnikłymi bieź viestak. Takija źviestki pryvodziać Tureckaja asacyjacyja sudnaŭładalnikaŭ, servis MarineTraffic i miascovyja ŭłady.

Dla paraŭnańnia: z pačatku vajennaha kanfliktu pamiž ZŠA i Iranam u kancy lutaha ŭ Armuzskim pralivie i na Blizkim Uschodzie ŭ cełym adbyłosia kala 130 napadaŭ na sudny. U vyniku zahinuli 25 marakoŭ, pavodle infarmacyi Mižnarodnaj marskoj arhanizacyi AAN.

Uvosień paŭnočnaja i centralnaja častki Čornaha mora faktyčna pieratvarylisia ŭ marskuju pustyniu. Rasijskija sudny bolš nie vychodziać u hety rajon. Karabli, jakija nakiroŭvajucca va Ukrainu — tolki da Dunaja kala miažy z Rumynijaj, — a taksama ŭ Rumyniju, Bałharyju, Turcyju i Hruziju i nazad, starajucca trymacca bližej da bierahoŭ, kab źnizić ryzyku rasijskich atak.

U kastryčniku 2026 hoda drony atakavali vosiem handlovych sudnaŭ u terytaryjalnych vodach Rumynii i Bałharyi abo ŭ prylehłych da ich zonach. Jašče dva karabli paciarpieli pablizu prylehłaj zony Bałharyi, u jaje vyklučnaj ekanamičnaj zonie. Adno sudna było atakavanaje ŭ dunajskim porcie Izmaił paśla taho, jak prajšło ŭzdoŭž bałharskaha i rumynskaha ŭźbiarežžaŭ. Amal u pałovie hetych vypadkaŭ maraki zahinuli, atrymali ranieńni abo źnikli bieź viestak.

Rasija admaŭlaje svaju datyčnaść da napadaŭ. Adnak premjer-ministr Bałharyi Rumien Radzieŭ zajaviŭ u Brusieli, a taksama rasijskaj ambasadarcy Eleanory Mitrafanavaj, jakuju vyklikali paśla adnaho ź incydentaŭ, što Bałharyja nie vieryć u mahčymaść ukrainskaj ataki na ŭłasnyja sudny i ekipažy. Pavodle jaho słoŭ, u takich dziejańniach nie było b nijakaj łohiki, a abstaviny napadu pakazvajuć na Rasiju.

Uzbrojenaja eskałacyja pryviała da rezkaha skaračeńnia kamiercyjnaha sudnachodstva ŭ Čornym mory. Pavodle danych arhanizacyi Global Fishing Watch, u kastryčniku kolkaść sudnaŭ, jakija zachodzili ŭ Čornaje mora praz Basfor, źmienšyłasia na 41% u paraŭnańni z kastryčnikam 2025 hoda. Kolkaść rejsaŭ u abodvuch napramkach za toj ža pieryjad skaraciłasia na 38%.

• 0
• 0
• 0
• 0
• 0
• 0
• 0
• 0