Muž mierkavanaj kitajskaj špijonki Elis Chuanh sam paznajomiŭ jaje z kiraŭnikom Nvidia

Kiraŭnik Nvidia Džensen Chuanh apynuŭsia ŭ centry špijonskaha skandału paśla taho, jak amierykanskija śpiecsłužby zapadozryli jaho blizkuju znajomuju, kitajskuju biznesmienku Elis Chuanh, u pracy na raźviedku Kitaja. Paźniej jon pryznaŭ, što mieŭ ź joj raman. Vyśvietliłasia taksama, što źviazanaja z Elis kampanija Megaspeed zakupiła amierykanskija čypy na miljardy dalaraŭ, niahledziačy na abmiežavańni ich pastavak u Kitaj.

Ciapier The Wall Street Journal raskryła novyja padrabiaznaści hetaj historyi. U centry ŭvahi žurnalistaŭ apynuŭsia muž Elis, kitajski finansist Kan Vej.

Ad inviestycyj u videahulni da Nvidia

Kan Vej, jakomu ciapier krychu bolš za 50 hadoŭ, niekali byŭ viadomym u Kitai kiraŭnikom inviestycyjnych fondaŭ. U 2010 hodzie jon zasnavaŭ kampaniju Shanghai Hexi, nazvu jakoj možna pierakłaści jak «harmaničny roskvit». Z 2016 hoda, pavodle karparatyŭnych dakumientaŭ, jon kiravaŭ joju razam z Elis.

Para inviestavała ŭ samyja roznyja haliny, ad raspracoŭki videahulniaŭ da farmaceŭtyki. Biznes byŭ pabudavany na razhalinavanaj sietcy kampanij, pamiž jakimi pieradavalisia doli ŭłasnaści, i na asabistych suviaziach, što dapamahali znachodzić novyja mahčymaści dla zarobku.

Mienavita inviestycyi ŭ hulniavuju industryju dazvolili Kan Veju jašče ŭ 2010‑ia hady paznajomicca z Džensenam Chuanham. U toj čas Nvidia była viadomaja pieradusim hrafičnymi pracesarami dla kampjutarnych hulniaŭ. Pavodle WSJ, z kiraŭnikom kampanii Kan paznajomiŭsia ŭ Azii praź ludziej z adnaho sa svaich inviestycyjnych prajektaŭ.

Paźniej Kan paznajomiŭ ź im i svaju žonku. Kali mienavita heta adbyłosia, žurnalisty nie ŭdakładniajuć. Ale z časam adnosiny Elis i Džensena pieraraśli ŭ raman, jaki, jak vyśvietliłasia, nie byŭ tajamnicaj dla jaje muža.

Pavodle ludziej, jakija asabista viedajuć paru, na praciahu prykładna dvuch hadoŭ Kan adkryta havaryŭ znajomym pra blizkaść žonki z kiraŭnikom Nvidia. Časam jon navat paŭžartam nazyvaŭ jaje asabistaj pamočnicaj Chuanha. Ź jaho pavodzin składałasia ŭražańnie, što jon pryniaŭ hetyja adnosiny, choć pra sapraŭdnyja pačućci muža žurnalistam ničoha nie viadoma.

Jak asabistyja suviazi dapamahali novamu biznesu

U pačatku 2020‑ch hadoŭ para zacikaviłasia chmarnymi vyličeńniami, a zatym i centrami apracoŭki danych dla štučnaha intelektu. Kali ZŠA ŭviali abmiežavańni na pastaŭki pieradavych pracesaraŭ u Kitaj, popyt na vyličalnyja mahutnaści za miažoj rezka vyras.

U 2023 hodzie Kan i Elis nabyli sinhapurskaje padraździaleńnie adnoj z kampanij, u jakija raniej inviestavali, i pierajmienavali jaho ŭ Megaspeed. Elis aficyjna stała dyrektarkaj, ale, pavodle WSJ, muž taksama niepasredna ŭdzielničaŭ u raźvićci biznesu.

Adnym z klučavych partnioraŭ novaha biznesu stała Alibaba. Kitajskamu technałahičnamu hihantu byli patrebnyja mahutnyja pracesary Nvidia, ale amierykanskija abmiežavańni pieraškadžali ich niepasrednym pastaŭkam u Kitaj. Tamu Alibaba šukała kampaniju, jakaja mahła b pastaŭlać joj vyličalnyja mahutnaści z data-centraŭ za miažoj.

Megaspeed paviedamiła Nvidia, što Alibaba stanie jaje bujnym klijentam. Pavodle krynic WSJ, mienavita pierśpiektyva takoha supracoŭnictva dapamahła sinhapurskaj kampanii ŭ listapadzie 2023 hoda atrymać status chmarnaha partniora Nvidia, a razam ź im i pryjarytetny dostup da deficytnych čypaŭ.

Nieŭzabavie Elis Chuanh raskazała adnamu sa znajomych, što źviazałasia z kiraŭnikom Nvidia Džensenam Chuanham i ciapier raźličvaje na paśpiachovy start biznesu Megaspeed.

Pavialičyć

Bolšaść nabytych siervieraŭ Megaspeed raźmiaściła ŭ Małajzii, adkul pradavała vyličalnyja mahutnaści Alibaba. Ale, jak śćviardžajuć krynicy WSJ, častku abstalavańnia kampanija pierapraviła niepasredna ŭ Kitaj, u tym liku šanchajskamu pastaŭščyku chmarnych pasłuh Century Litong. Jaho ŭładalnik raniej mieŭ dziełavyja suviazi z Kan Vejem.

Heta mahło parušać amierykanskija ekspartnyja abmiežavańni. Sama Megaspeed nastojvaje, što dziejničaje ŭ poŭnaj adpaviednaści z zakanadaŭstvam.

Niahledziačy na ryzyki, muž i žonka praciahvali šukać inviestaraŭ. Pavodle surazmoŭcaŭ WSJ, u 2024‑2025 hadach jany prapanoŭvali ŭkłaści hrošy ŭ niekalki novych data-centraŭ u Paŭdniova-Uschodniaj Azii i Šanchai. Patencyjnym partnioram abiacali mahčymaść patroić układzienyja srodki za try hady i zapeŭnivali, što majuć sposaby dastaŭlać čypy Nvidia ŭ Kitaj.

Ciapier prablemy va ŭsich

Na fonie rasśledavańnia pastavak amierykanskich pracesaraŭ pad uvahu pravaachoŭnych orhanaŭ trapili i Elis, i Kan.

Jak vyśvietliła The Wall Street Journal, raniej u 2026 hodzie Kan Veja zatrymali ŭ Šanchai ŭ miežach rasśledavańnia mahčymych manipulacyj z akcyjami kampanij, jakija handlujucca na biržy. Niadaŭna jaho vyzvalili.

Elis tym časam zabaranili ŭjezd na Tajvań, dzie jana nieadnarazova sustrakałasia z Džensenam Chuanham. Miascovyja ŭłady praviarajuć, ci mahli jaje pajezdki być źviazanyja sa zboram raźviedvalnaj infarmacyi.

ZŠA i Sinhapur taksama praciahvajuć rasśledavać dziejnaść Megaspeed. Piekin adchilaje paviedamleńni pra mahčymuju pracu Elis na kitajskija śpiecsłužby.

Sam Džensen Chuanh pryznaŭ pazašlubnuju suviaź z Elis i paprasiŭ prabačeńnia ŭ siamji i supracoŭnikaŭ Nvidia. Paźniej jon pakinuŭ pasadu hienieralnaha dyrektara Nvidia.

Ni Kan Vej, ni Elis Chuanh nie adkazali na prośby žurnalistaŭ pra kamientaryj.

• 0
• 0
• 0
• 2
• 0
• 0
• 0
• 0