Беларускім школьнікам рэкамендуюць расказваць пра загінулых ва Украіне расійскіх салдат і афіцэраў
У телеграм-канале «МотолькоПомоги» сёння з'явілася інфармацыя пра тое, што ў школах Мінскага раёна правядуць «урок добраахвотніцтва» ў падтрымку «вайскоўцаў, якія праводзяць спецаперацыю на тэрыторыі Украіны». Ліст з адпаведнымі інструкцыямі нібыта за подпісам (якога, зрэшты, на паперы няма) загадчыцы дашкольнай і агульнай сярэдняй адукацыі Мінскага райвыканкама Наталлі Міхадзюк быў разасланы па школах. Ці сапраўды быў такі дакумент і што гэта значыць, разбіралася Zerkalo.io.
Падчас «урока добраахвотніцтва» дзецям, паводле дакумента, павінны расказаць пра загінулых падчас вайны ва Украіне расійскіх салдат і афіцэраў, а таксама прапанаваць напісаць лісты падтрымкі «вайскоўцам, якія праводзяць спецаперацыю на тэрыторыі Украіны».
Акрамя гэтага, вучням мусяць расказаць, як правесці «добраахвотніцкую акцыю» з хэштэгам ZА_МИР.
У разасланым дакуменце адзначалася, што правесці ўрок неабходна ў мэтах «стварэння ўмоў для грамадзянска-патрыятычнага і духоўна-маральнага выхавання дзяцей».
У дакуменце, які з'явіўся ў Сеціве, спасылаліся на ліст Беларускага «Рэспубліканскага цэнтра экалогіі і краязнаўства». Таксама прыкладалася спасылка на метадычныя матэрыялы аб правядзенні ўрока добраахвотніцтва ў Расіі.
У гэтай прэзентацыі расказваецца пра герояў Расіі. Напрыклад, пра камандзіра роты 247-га гвардзейскага дэсантна-штурмавога Каўказскага казацкага палка ПДВ Расіі Нурмагамеда Гаджымагамедава, які загінуў 24 лютага падчас вайны ва Украіне.
Ёсць і хатняе заданне: распрацаваць і правесці мерапрыемства і падзяліцца вынікамі, выклаўшы іх у сацсетках пад хэштэгамі #ZА_МИР, #добровольцыроссии #делайдобро, #волонтер, #доброта.
Справаздачу аб праведзенай працы, паводле ліста з мінскага райвыканкама, неабходна было размясціць у Google-дакуменце.
Спачатку ён быў адкрыты для рэдагавання, там значыліся школы Мінскага раёна. Аднак вельмі хутка хтосьці запоўніў дакумент знакамітай фразай пра расійскі вайсковы карабель, пасля чаго файл перамясцілі ў кошык.
Журналісты патэлефанавалі ў «Рэспубліканскі цэнтр экалогіі і краязнаўства» пад выглядам аднаго з вучняў школы, у якой прапаноўвалася правесці ўрок. Там ім адказалі, што не з'яўляюцца арганізатарамі акцыі, а проста аказваюць інфармацыйную падтрымку і наогул праводзіць занятак неабавязкова:
— У нас з расійскім «Федэральным цэнтрам дадатковай адукацыі і арганізацыі адпачынку і аздараўлення дзяцей», а таксама «Федэральным цэнтрам дзіцяча-юнацкага турызму і краязнаўства» ёсць пагадненні аб супрацоўніцтве. Яны рэкламуюць нашы мерапрыемствы, мы — іхныя.
— У метадычных рэкамендацыях, якія выкладзеныя ў Інтэрнэце, напісана аб падтрымцы расійскіх вайскоўцаў. Навошта беларускім дзецям такія ўрокі?
— Вы не бачылі тыя метадычныя рэкамендацыі. Там іншыя. Яны выкладзеныя на сайце расійскіх цэнтраў і там можна з імі азнаёміцца, — параіла спецыялістка «Рэспубліканскага цэнтра экалогіі і краязнаўства».
Якія «іншыя» метадычкі мусілі быць, спецыялістка не ўдакладніла.
На сайце «Федэральнага цэнтра дадатковай адукацыі і арганізацыі адпачынку і аздараўлення дзяцей» выкладзеныя менавіта тыя метадычныя рэкамендацыі, якія фігуруюць у лісце з Мінскага райвыканкама.
А на сайце расійскага «Федэральнага цэнтра дзіцяча-юнацкага турызму» журналісты знайшлі толькі метадычныя рэкамендацыі па арганізацыі тэматычнай змены, тэматычнага дня і тэматычнага мерапрыемства па добраахвотніцтве. Там няма згадак пра вайну ва Украіне, бо яны былі складзеныя ў 2020 годзе.
Сёлета ў самой Расіі ўрок добраахвотніцтва праходзіць у рамках Усерасійскага марафону «Руская вясна». У ім прынялі ўдзел больш за 2,7 мільёнаў чалавек са сферы адукацыі (у тым ліку і педагогі) з 67 рэгіёнаў Расіі. Пра гэта паведамляла расійскае Міністэрства асветы.
Цяпер чытаюць
Міжнародны крымінальны суд пачаў расследаванне злачынстваў, здзейсненых рэжымам Лукашэнкі20
Каментары