На рынку ў Ждановічах запэўнілі, што ён не знікне, а толькі перабудуецца
Апошнім часам у сацыяльных сетках і медыя шырока абмяркоўваюць дэмантаж гандлёвых радоў у раёне ГЦ «Ждановічы». Кажуць нават, што праз будаўніцтва новага пуцеправода легендарны рынак можа знікнуць, але агенцтва «Мінск-Навіны» сцвярджае, што гэта не так. Насамрэч рынак, маўляў, не закрываецца, а перабудоўваецца.
У мінулым годзе пачалася праца над праектам пуцеправода, які злучыць Цэнтральны і Фрунзенскі раёны. Мост павінен дапамагчы пазбавіцца ад затораў і палегчыць выезд на МКАД і ў бок Заслаўля. Новы ўчастак вуліцы Калеснікава пракладуць над чыгункай і тэрыторыяй рынку. У сувязі з гэтым, як гавораць у адміністрацыі, узнікла тэхнічная неабходнасць пераносу некаторых павільёнаў.
Намесніца начальніка камерцыйнага аддзела Алеся Патоцкая расказала, што перанос пачаўся каля месяца таму: павільёны каля ГЦ «Свет моды 2» цяпер размешчаныя побач з ГЦ «Свет моды 1» і на асноўнай пляцоўцы «Моднага квартала». Павільёны зоабатанічнага рынку перайшлі ў ранейшую зону «Мэблі».
На рынку каля 2450 гандлёвых пунктаў, з іх пад перанос трапіла 185 — большасць рэчавага і частка зоабатанічнага рынку. Па словах Патоцкай, амаль усе арандатары засталіся, адмовіліся ад далейшай працы толькі 2—3 пункты. У сацыяльных сетках жа, маўляў, сітуацыя перабольшваецца.
Перанос павільёнаў адбываецца плаўна: частка перамясцілася толькі на некалькі дзясяткаў метраў, некаторыя яшчэ адкрытыя для пакупнікоў. Прадпрымальніца Аксана, якая прадае хатніх жывёл, адзначае, што пераезд напружвае, бо транспартаванне жывёл складанае. Але адміністрацыя рынку запэўнівае, што новае месца ў «Модным квартале» будзе прасторным і зручным для ўсіх.
Іншыя апытаныя гандляры запэўніваюць, што перабудовай задаволеныя: маўляў, галоўная праблема сучасных рынкаў — канкурэнцыя інтэрнэт-пляцовак, а новы мост, наадварот, павялічыць праходнасць пакупнікоў. Усе крамы, уключаючы і в’етнамскую кавярню «Сайгон», нібыта працуюць у звычайным рэжыме, хоць і ў новых лакацыях.
На Ждановічах знеслі легендарны «Сайгон»
Праезд у мінскай маршрутцы, што меўся падаражэць да пяці рублёў, будзе каштаваць меней
На МКАД пачалі рэканструкцыю аднаго з мастоў
«Свінні зарохкалі. Без вады даўно не сядзелі, я б ім адключыў». Азаронак абрынуўся на жыхароў раёна Лебядзіны
Прэстыжныя мікрараёны Мінска ператварыліся ў міннае поле — новая праблема
Цяпер чытаюць
ЗША паведамілі, што вызваленне палітвязняў у Беларусі «адкладзенае на некаторы час»21
Каментары