Любіць беларус дысцыпліну, што ні кажы.
Пакуль былі малыя штрафы за піццё на вуліцы і балаканне па мабільным за стырном, — ніхто гэтыя рэчы і за парушэнні не лічыў.
Змены ў Кодэксах многіх дысцыплінуюць. У Заходняй Беларусі ў часы Пілсудскага гаспадароў каралі за павалены плот, разбітую вуліцу перад сядзібай.
Людзі бурчэлі, але дагэтуль у заходнікаў больш парадку і менш развалу.
Часам прыходзіцца ўжыўляць у цела грамадства элементы побытавай культуры такім жорсткім спосабам.
Новыя папраўкі ў Адміністратыўным кодэксе празвалі «піўным законам». Згодна з імі, піццё піва ці чарніла ў грамадскім месцы можа абярнуцца штрафам да паўмільёна. Да новаўвядзення люд ставіцца па‑рознаму. «Даўно трэба было гэта зрабіць! — кажуць настаўнікі. — Пілі ўжо нават у крамах, не адыходзячы ад прылаўка. А дзеці ж на гэта ўсё глядзяць, вучацца».
Цяпер у крамах не п’юць — участковыя атрымалі доўгачаканы стымул для шчыльнай працы з «кантынгентам». У вёсцы ўчастковы кожнага выпівоху ведае як аблупленага. Можна адразу караць рублём.
А што значыць для вёскі штраф у паўмільёна пры зімовых заробках у 150 тысяч?
«Хай гарадскіх штрафуюць, яны багацейшыя!» — абураюцца аматары выпіць. Напалохаліся і прадавачкі: правяраюць пашпарты ў падазрона маладых пакупнікоў, выганяюць з крамы апівудаў.
Як вынік — п’яных у працоўны час паменела. «Позна спахапіліся, каб раней, то колькі б сем’яў ды жыццяў збераглі», — кажуць людзі. Але адчуваецца, што ініцыятыва ўладаў знайшла пазітыўны водгук у большасці. Любіць беларус дысцыпліну, што ні кажы.
-
Гэта так проста — а падтрымаеце сваіх. Пералічыце 1,5% падаходнага на беларускую справу
-
Калі вы працуеце ў Польшчы, то можаце за хвіліну падтрымаць «Нашу Ніву» 1,5% падаходнага, не патраціўшы ані гроша. Вось як
-
Працуеце ў Літве? Падтрымайце «Нашу Ніву» — для вас гэта цалкам бясплатна, а мы зможам зрабіць больш для Беларусі і беларушчыны!
Цяпер чытаюць
«Чаму я павінен даказваць, што не дармаед?» Прадпрымальніка з Гомеля памылкова запісалі ў незанятыя — ён даведаўся толькі пасля вялізных рахункаў за камуналку16
Каментары