У справе фігуруе разнабой у дакументах Мінгарвыканкама, падпісаных чыноўнікам.
У Мінскім абласным судзе працягваецца разгляд справы былога першага намесніка старшыні Мінгарвыканкама Ігара Васільева.
21 снежня былі дапытаныя сведкі па гэтай справе: намесніца сталічнага кіраўніка Жанна Бірыч, экс-намеснік Сяргей Радаман і начальніца юрыдычнага аддзела Мінгарвыканкама Ірына Вусава.
Пытанні тычыліся заключэння дамовы з чэшскай фірмай на будаўніцтва ў Мінску завода па перапрацоўцы смецця. У сувязі з гэтым сталі вядомыя некаторыя акалічнасці. У прыватнасці,
на дамове паміж сталічнай мэрыяй і чэшскай фірмай стаіць дата — 31 сакавіка 2011 года. А сюжэт з гэтага падпісання на тэлеканале СТБ з’явіўся яшчэ 16 сакавіка.
Пра гэта сведчаць матэрыялы справы, агучаныя на працэсе. Г.зн. дамова падпісвалася на два тыдні раней, прычым у святочнай атмасферы. Але яшчэ больш цікавы факт, што
ад чэшскай фірмы ў Мінгарвыканкам заява з просьбай заключыць з імі інвестыцыйны праект паступіла 17 сакавіка.
Начальніца юрыдычнага аддзела Мінгарвыканкама на судзе выказала версію, як магло атрымацца, што заява паступіла пасля падпісання дамовы. Заява магла падавацца раней, але праз магчымыя недапрацоўкі ці памылкі магла перапісвацца і зноў падавацца. Але гэта толькі меркаванне. Было б цікава даведацца, што пра гэта думае сам старшыня гарвыканкама Мікалай Ладуцька, які падпісваў дамову. Хаця зразумела, што ён асоба тэхнічная ў такіх справах — дакументы рыхтуюць яго надначаленыя.
Пакуль ні адзін з бакоў не заявіў пра жаданне дапытаць у судзе Ладуцьку.
Але працэс не скончаны. Можа яшчэ і пабачам мэра на судзе над яго экс-намеснікам.
Што да чэшскай фірмы «ЭкаКлінЭнэрджы», то завод яна ў Мінску не пабудуе. Прынамсі, папярэдняя дамова разарваная ў кастрычніку. А ў лістападзе ў Гаспадарчы суд падалі заяву аб спагнанні штрафных санкцый з фірмы, паколькі сама фірма таго не выканала.
Цяпер чытаюць
«Быў галодны, як з Асвенціма, не еў ні мяса, ні гародніны». Што вядома пра смерць бабруйскага журналіста, на якога завялі крымінальную справу ў Польшчы1919
Каментары