Завяршаецца расследаванне па справе аб выбуху ў жылым доме ў Лагойскім раёне ў лютым 2012 года. Пра гэта напрэс-канферэнцыі 24 студзеня паведаміў старшыня Следчага камітэта Беларусі Валянцін Шаеў.
Нагадаем, выбух у трохпавярховым на тры пад’езды панэльным інтэрнаце, што на тэрыторыі воінскай часці 30151 у вёсцы Малінаўка, прагрымеў днём 8 лютага. Было абвешчана, што адзін чалавек загінуў, чацвёра — параненыя. Дзевяць кватэр дома поўнасцю разбураныя, а ўсяго ў доме 21 кватэра. Жыхароў дома часова засялілі ў санаторый «Рудня» медыцынскага цэнтра МТЗ у вёсцы Янушкавічы Лагойскага раёна. Па факце выбуху была распачата справа па частцы 3 артыкула 304 Крымінальнага кодэкса (парушэнне правіл пажарнай бяспекі).
На наступны дзень пасля выбуху ў СК паведамілі, што следства адпрацоўвае адну асноўную версію — гэта ўцечка бытавога газу. Паводле слоў жыхароў, на працягу трох дзён быў чутны пах газу ў гэтым доме. Падчас расследавання па гэтай крымінальнай справе праведзена выманне аўдыёперамоў дыспетчарскай службы газу і жыхароў гэтага дома, якія дазволяць адказаць на пытанне, ці была інфармацыя пра пах газу на працягу некалькіх апошніх сутак. У СК таксама ўдакладнілі, што ў выніку выбуху адзін чалавек загінуў, яшчэ 15 пацярпелі. Больш за 30 жыхароў размешчаныя ў санаторыі «Рудня».
Паводле слоў Шаева, як устаноўлена экспертамі і сабранымі падчас расследавання матэрыяламі, прычынай выбуху стала ўзгаранне газапаветранай сумесі, якая ўтварылася ў выніку ўцечкі газу з сістэмы газазабеспячэння дома.
«Паводле меркавання следства, трагедыю можна было б прадухіліць, калі б работнікі „Лагойскрайгазу“ своечасова і належным чынам адрэагавалі на паведамленні, якія паступалі ад жыхароў дома», — сказаў старшыня СК.
Аднаму з кіруючых работнікаў «Лагойскрайгазу» прад’яўлена абвінавачанне ў службовай халатнасці. Найбліжэйшым часам плануецца прад’явіць абвінавачанне яшчэ аднаму работніку гэтага прадпрыемства, сказаў Шаеў.
Паводле слоў кіраўніка СК, у выніку выбуху адзін чалавек загінуў, два атрымалі цяжкія цялесныя пашкоджанні, адзін — меней цяжкія цялесныя пашкоджанні і адзін — лёгкія цялесныя пашкоджанні.
Каментары