Падазраваны ў забойстве студэнткі быў пераставіў у сацсетцы аб'яву аб яе пошуку
Праз трагедыю ў Мазырскім універсітэце адмянілі ўрачыстасці для выпускнікоў.
«Ведала яе сямнаццаць гадоў. Як кажуць, разам у лялькі гулялі. Гэта быў вясёлы і жыццярадасны чалавек. Шкада, што нейкі вылюдак можа вырашаць чужыя лёсы, — не стрымлівае эмоцый сяброўка забітай Аня. — Ліля была адзіным дзіцём у сям’і.Мне дарагі гэты чалавек, а гэтаму ... пагражае, як мне сказалі, 6-15 гадоў. Малавата неяк. Яму б пажыццёвае...»
23-гадовая Лілія знікла ў панядзелак. Увечары выйшла з дому і не вярнулася. Дзяўчыну знайшлі забітай на наступныя суткі ў лесе пад Рэчыцай. А праз дзень у Мазыры затрымалі і падазраванага. Гэта сакурснік Ліліі, з якім яна некалі сустракалася. Але затым адносіны не склаліся. Цяпер хлопец хацеў «адматаць» ўсё назад.
У панядзелак увечары Лілія вярталася са спаткання. Абяцала патэлефанаваць свайму маладому чалавеку, калі вернецца. Але каля пад’езда яе чакаў былы бойфрэнд, грамадзянін Расіі з відам на жыхарства ў нашай краіне. Ён прыехаў на машыне, прапанаваў пагаварыць. Ад’ехалі да вёскі Ваўчыная Гара.Толькі размовы не атрымалася: дзяўчына адмовілася зноў сустракацца.
Хлопец схапіў востры прадмет і ўдарыў каханую па твары. А калі зразумеў, што дзяўчына памерла, схаваў у лесе, прысыпаўшы лісцем.
«Такая фармулёўка — «колюча-рэжучы прадмет» — праз тое, што прадмет пакуль не знайшлі. Таму не можам назваць яго», — сказала «Нашай Ніве» прадстаўніца Следчага камітэта па Гомельскай вобласці Марыя Крываногава. Па яе словах, пакуль можна гаварыць пра адзін удар у твар. Ёсць і іншыя пашкоджанні на целе, але іх паходжанне вызначыць экспертыза: магчыма, яны з’явіліся, калі цела пераносілі.
Цяпер падазраваны знаходзіцца ў ізалятары. Ён прызнаў сваю віну.
«Лілія была добрай дзяўчынай, адказнай, разважлівай, — прыгадвае сваю аднакурсніцу Таццяна. — Была харашысткай, яе фотаздымак вісеў на стэндзе найлепшых студэнтаў. Шкада, калі сыходзяць такія людзі».
Яна вучылася ў Мазырскім дзяржаўным педагагічным універсітэце імя Шамякіна. Спецыяльнасць — біялогія і ахова прыроды.
«У суботу мы павінны атрымліваць дыпломы. Ліля паспяхова здала ўсе дзяржэкзамены... У сувязі з жалобай урачыстасці адмененыя»,
— расказала Таццяна.
Сябры забітай не хочуць гаварыць пра затрыманага хлопца. Кажуць толькі, што вучыўся ён не ў адной групе з Ліліяй.
26 ранкам падазраваны пераставіў абвестку аб пошуку дзяўчыны на сваёй старонцы ў сацыяльных сетках. А 26 чэрвеня ўдзень яго затрымалі.
Цяпер чытаюць
Адміністратарка «Штаба Аношак» валодае беларускай кампаніяй, датычнай да паставак санкцыйных паўправаднікоў у ваюючую Расію7
Адміністратарка «Штаба Аношак» валодае беларускай кампаніяй, датычнай да паставак санкцыйных паўправаднікоў у ваюючую Расію
Расійскі рэпер Ягор Крыд зняўся ў майцы з выявай героя фільма «Ідзі і глядзі», якому дамалявалі пірсінг і татуіроўкі. Цішотку выпусцілі крама беларускі66
Расійскі рэпер Ягор Крыд зняўся ў майцы з выявай героя фільма «Ідзі і глядзі», якому дамалявалі пірсінг і татуіроўкі. Цішотку выпусцілі крама беларускі6
«Запрасіў мяне на спатканне і прыехаў на яго з пакетам памідораў замест кветак». Што ўспамінаюць пра Яна Памедора Рэуцкага, адміна шматтысячнай суполкі беларусаў Польшчы77
Каментары