Улады Францыі ў чацвер аб'явілі, што французскія дактары ўпершыню ў гісторыі выявілі вірус Шамонда, які звычайна паражае жывёл, у чалавека. Гэты пацыент памёр, але ўлады падкрэсліваюць, што гэта быў асаблівы выпадак, і ў цэлым вірус не ўяўляе небяспекі для людзей, піша Бі-бі-сі.
Вірус Шамонда звычайна перадаецца сярод жывёл праз укусы дробных крывасмокавых насякомых. Ён цыркулюе ў Афрыцы і Азіі ўжо некалькі дзясяткаў гадоў, а ў Еўропе быў упершыню выяўлены гэтым летам.
У сумеснай заяве міністэрстваў аховы здароўя і сельскай гаспадаркі Францыі сказана, што ва ўмерлага пацыента былі сур'ёзныя праблемы з імуннай сістэмай, і таму ён уяўляе сабой выключны выпадак.
«Неўралагічныя ўскладненні, якія назіраліся ў гэтага пацыента з пашкоджаннем імуннай сістэмы перад яго смерцю, з вялікай ступенню верагоднасці можна звязаць з заражэннем вірусам Шамонда», — заявілі французскія міністэрствы, падкрэсліўшы пры гэтым, што спецыялісты працягваюць клінічныя, біялагічныя і эпідэміялагічныя даследаванні гэтага выпадку.
Паводле папярэдніх звестак, памерлы пацыент заразіўся вірусам, калі яго ўкусіла мошка.
Гэта адбылося на ўсходзе Францыі, дзе вірус цыркулюе сярод жывёл.
Еўрапейскі цэнтр прафілактыкі і кантролю захворванняў (ECDC) заявіў, што ўважліва сочыць за французскім выпадкам і яго наступствамі.
«ECDC падтрымлівае сувязь з французскімі ўладамі і еўрапейскімі партнёрамі і высвятляе патэнцыйныя наступствы для здароўя грамадства», — гаворыцца ў заяве цэнтра.
Як паведамляе Сусветная арганізацыя здароўя жывёл (WOAH), сярод хатніх жывёл вірус Шамонда ў асноўным паражае буйную рагатую жывёлу, але яго выяўлялі і ў коней, авечак і коз.
У буйной рагатай жывёлы ён выклікае вострую дыярэю, ліхаманку, дрымотнасць і падзенне надояў. Як паведамляе агенцтва Reuters, на французскіх фермах надоі ў паражаных вірусам Шамонда кароў знізіліся ў чатыры разы.
Упершыню гэты вірус быў выяўлены ў Нігерыі ў сярэдзіне 1960‑х гадоў і з таго часу распаўсюдзіўся на некаторыя рэгіёны Афрыкі, а таксама на Японію.
У Еўропе прысутнасць віруса Шамонда зафіксавалі ў канцы ліпеня — аналізы паказалі яго наяўнасць у жывёл у паўднёвай Германіі, Швейцарыі і ва ўсходняй Францыі.
З таго часу, паводле звестак французскага штотыднёвага ветэрынарнага бюлетэня, ён выяўлены ўжо ў 14 краінах Заходняй Еўропы, ад Ірландыі і Партугаліі да Аўстрыі і Славеніі.
Цяпер чытаюць
Хто такая Алеся Пархоменка з Кіпра, якая развязала беларуска-беларускую вайну93
Хто такая Алеся Пархоменка з Кіпра, якая развязала беларуска-беларускую вайну
«Доктарка», адвакат, чалавек з камерай і некалькі дужых хлопцаў. У Петрапаўлаўскай Баршчагоўцы расійскія спецслужбы скарысталіся спецыфічным украінскім бізнэсам ваеннага часу1515
Каментары