Улады ПАР абвясцілі, што першы чарнаскуры прэзідэнт краіны, лаўрэат Нобелеўскай прэміі міру Нэльсан Мандэла памёр на 96-м годзе жыцця.
Дзеючы кіраўнік дзяржавы Джэйкаб Зума выказаўся пра яго, як пра бацьку нацыі.
Лідары вядучых краін свету выказваюць спачуванні народу Паўднёвай Афрыкі.
Мандэла памёр у сваім доме ў Ёханэсбургу, дзе сабраліся члены яго сям'і. Ён доўга хварэў. Два дні таму яго дачка Маказіве Мандэла распавяла, што ён знаходзіцца пры смерці, але працягвае мужна супраціўляцца смерці.
Прэзідэнт Зума сказаў, што Мандэла больш, чым хто-небудзь іншы, увасабляў сабой нацыянальнае адзінства Паўднёвай Афрыкі.
Па словах прэзідэнта, усе сцягі ў краіне будуць прыспушчаны да пахавання Мандэлы. Ён будзе пахаваны з дзяржаўнымі ўшанаваннямі як бацька нацыі.
У верасні Мандэлу выпісалі з бальніцы, дзе ён праходзіў лячэнне ад пнеўманіі, і з таго часу ён знаходзіўся дома, дзе за ім быў арганізаваны пастаянны догляд.
Нэльсан Мандэла — вядомы змагар з апартэідам, правёў у турме 27 гадоў. У 1993 атрымаў Нобелеўскую прэмію міру, у 1994—1999 — прэзідэнт ПАР.
Велізарныя натоўпы людзей уначы сабраліся вакол дома Мандэлы, многія спяваюць песні часоў барацьбы з апартэідам. Людзі, якія сабраліся прывялі з сабой і дзяцей.
Паўднёваафрыканцы, розныя па колеру скуры, глыбока засмучаныя смерцю чалавека, якога яны называюць вызваляльнікам.
Першы чарнаскуры прэзідэнт ЗША Барак Абама сказаў, што Нэльсан Мандэла «дасягнуў у жыцці большага, чым можна чакаць ад любога іншага чалавека - ён ахвяраваў сваёй свабодай дзеля свабоды народа».
Брытанскі прэм'ер-міністр Дэвід Кэмеран заявіў, што згасла вялікая крыніца святла для ўсяго чалавецтва.
Ён распарадзіўся прыспусціць сцяг над сваёй рэзідэнцыяй на Даўнінг-стрыт.
Былы прэзідэнт ЗША Джордж Буш-малодшы заявіў: «Прэзідэнт Мандэла быў вялікім змагаром за свабоду і роўнасць. Ён нёс сваю ношу з годнасцю, і наш свет стаў лепш дзякуючы ягонаму прыкладу».
Прынц Уільям назваў Нэльсана Мандэлу «незвычайным чалавекам, які натхніў многіх людзей». «Гэта выключна сумная і трагічная навіна», — сказаў ён пра смерць экс -прэзідэнта ПАР.
Жыццё і барацьба Нэльсана Мандэлы
Каментары