16 дзяцей са Снежнага баевікі сілай вывезлі ў Расію, 9 змаглі вырвацца
16 выхаванцаў інтэрната ў Снежным сілай вывезены ў Расійскую Федэрацыю і цяпер знаходзяцца ў лагеры для бежанцаў у Навашахцінску (Растоўская вобласць).
Разам з дзецьмі-сіротамі знаходзяцца двое ўкраінскіх выхавацеляў, паведаміла «Голасу Украіны» начальнік службы па справах дзяцей Данецкай абласной дзяржадміністрацыі Вера Сагайдак.
Як паведамлялася, у чацвер узброеныя баевікі захапілі аўтобус, на якім ехалі на адпачынак у Днепрапятроўскую вобласць 25 дзяцей-сірот і выхаванцаў дзіцячых дамоў сямейнага тыпу. Транспарт развярнулі ў бок кантрольна-прапускнога пункта «Даўжанскі» на Луганшчыне.
«Мама-выхавацелька дзіцячага дома сямейнага тыпу з 2 роднымі і 7 прыёмнымі дзецьмі катэгарычна адмовілася пакідаць Украіну і цяпер вяртаецца назад», — сказала Сагайдак.
«Іншых дзяцей, ад 1996 да 2008 г.г нараджэння, сілай перавялі праз мяжу. Зараз 16 выхаванцаў інтэрната і двое выхавацеляў знаходзяцца ў лагеры для бежанцаў у Навашахцінску», — распавяла суразмоўца.
Узброеныя баевікі перашкодзілі вывезці і 30 выхаванцаў дома малюткі ў Краматорску. Усё было падрыхтавана да транспартоўкі дзяцей ад нараджэння да 3 гадоў, многія з іх — з прыроджанымі сур'ёзнымі захворваннямі.
Але напярэдадні хтосьці з персаналу «зліў» інфармацыю прадстаўнікам самаабвешчанай «Данецкай народнай рэспублікі». Тыя з'явіліся ў дом малюткі ўвечары, пераначавалі, а раніцай перашкодзілі вывазу дзяцей.
Выхаванцаў дзіцячага прытулку ў Краматорску ўдалося эвакуіраваць раней. Пасля чаго дырэктара прытулку выклікалі ў «камендатуру» горада і пачалі высвятляць, з якой мэтай ён вывез дзяцей.
«Абвінавачваюць у тым, што малых вывозяць з мэтай продажу», — падзяліліся інфармацыяй у службе па справах дзяцей.
Відавочцы кажуць, што пасля таго, як выхаванцы прытулку шчасна пакінулі горад, ва установе з'явілася здымачная група расейскага НТВ і расчаравана канстатавала: «А мы не паспелі зняць, як яны ў падвалы хаваюцца!».
Выданне удакладняе, што ў падвалы хаваюцца жыхары Славянска, а ня Краматорска.
Цяпер чытаюць
Расійскі прадавец паспяховага поспеху паспрабаваў адкрыць філіял у Мінску. Рэакцыя беларусаў была паказальнай7
Расійскі прадавец паспяховага поспеху паспрабаваў адкрыць філіял у Мінску. Рэакцыя беларусаў была паказальнай
«Месяцамі ў кабіне, на сябе забіў. І стаў пытаць: можа, жонка таксама будзе працаваць?». Чаму эміграцыя разбівае сем’і і што рабіць, каб усё паправіць3434
Каментары