Прадстаўнікі шэрагу грамадскіх аб`яднанняў і грамадзянскіх ініцыятыў 28 верасня ў Жодзіне прынялі рашэнне аб падтрымцы вылучэння кандыдатам у прэзідэнты на выбарах 2015 года намесніка старшыні Беларускай сацыял-дэмакратычнай партыі (Грамада) генерала Валерыя Фралова.
Пра гэта паведаміў БелаПАН кіраўнік грамадзянскай ініцыятывы «Саюз афіцэраў і салдат» Кірыл Жываловіч.
З прапановай падтрымаць намер Фралова ўзяць удзел у выбарчай кампаніі выступіў грамадскі актывіст, былы дэпутат жодзінскага гарсавета Аляксандр Валчанін.
«Наступныя выбары на фоне ўскладнення эканамічнага крызісу ў краіне, росту карупцыі і ўцёкаў з Беларусі галоўнага капіталу — кваліфікаваных кадраў вымушаюць нас не быць абыякавымі. Мы не можам больш спадзявацца на штатных змагароў за светлую будучыню народа з апазіцыйнага асяроддзя, абцяжараных працэдурамі выбару адзінага кандыдата. Гэты працэс можа зацягнуцца надоўга, і ў выніку ён пазбавіць нас часу на актыўную агітацыйную кампанію і прывядзе да чыста фармальных вынікаў, без рэальнага аб`яднання намаганняў», — сказаў ён.
Валчанін падкрэсліў: «Сітуацыя вымушае вылучыць на ўдзел у выбарах генерала Фралова, грамадзянская пазіцыя і палітычныя погляды якога нам добра вядомыя даўно».
Падтрымаў ініцыятыву аб вылучэнні Фралова кандыдатам у прэзідэнты старшыня арганізацыйнага камітэта па стварэнні руху ветэранаў баявых дзеянняў «Абаронцы Айчыны» Аляксандр Камароўскі.
«Ведаючы Валерыя Фралова як сапраўднага патрыёта Беларусі, чалавека гонару, годнасці і палітычнага прафесіяналізму, прапаноўваю прыкласці ўсе намаганні для вылучэння яго кандыдатам у прэзідэнты Рэспублікі Беларусь», — сказаў ён.
Былы дэпутат Палаты прадстаўнікоў Валерый Фралоў аб рашэнні вылучыць сваю кандыдатуру на выбарах прэзідэнта ў 2015 годзе заявіў у чэрвені 2014 года.
«Адзіны кандыдат — гэта не панацэя. Дай бог, каб такое адбылося, але я ў гэта слаба веру», — сказаў ён. На думку палітыка, лепшай перадвыбарнай стратэгіяй было б вылучэнне некалькіх кандыдатаў, «кампетэнтных у розных сферах». «А потым напярэдадні выбараў паглядзець на рэйтынгі, зняцца на карысць чалавека з найвышэйшым рэйтынгам, запрасіць сваіх прыхільнікаў прагаласаваць за яго і такім чынам выйсці на рэальнага адзінага», — дадаў ён.
Фралоў ужо вылучаўся ў прэзідэнты ў 2006 годзе, але змог сабраць крыху больш за 58 тысяч подпісаў пры неабходных для рэгістрацыі 100 тысячах.
Сам Фралоў растлумачыў гэта недахопам фінансавання. Тады палітык падтрымаў кандыдата ў прэзідэнты ад сваёй партыі Аляксандра Казуліна.
Цяпер чытаюць
«Месяцамі ў кабіне, на сябе забіў. І стаў пытаць: можа, жонка таксама будзе працаваць?». Чаму эміграцыя разбівае сем’і і што рабіць, каб усё паправіць3737
Каментары