Судовая калегія Мінскага гарадскога суда 21 кастрычніка пакінула ў сіле прыгавор суда Кастрычніцкага раёна сталіцы ў дачыненні да Андрэя Бандарэнкі.
Касацыйная скарга Бандарэнкі і яго абароны была пакінутая без задавальнення.
Нагадаем, 12 жніўня суд Кастрычніцкага раёна Мінска прызначыў былому дырэктару прыватнай інфармацыйна-асветнай установы «Платформ інавейшн» Бандарэнку пакаранне ў выглядзе чатырох гадоў пазбаўлення волі ў калоніі ўзмоцненага рэжыму, але за кошт амністыі тэрмін быў скарочаны да трох гадоў.
41-гадовы Бандарэнка прызнаны вінаватым ва ўчыненні хуліганства, злоснага хуліганства і асабліва злоснага хуліганства (часткі 1, 2 і 3 арт. 339 КК).
Андрэю Бандарэнку інкрымінаваліся тры эпізоды злачынстваў. Першы — інцыдэнт, які адбыўся 5 лютага з удзелам Артура Яворскага каля кафэ «Старажытная легенда» на вуліцы Чкалава. Другі — сварка ноччу 27 сакавіка ў пад'ездзе дома па вуліцы Чкалава, дзе жыве Бандарэнка. Размова ідзе пра канфлікт з суседкай Таццянай Радзівон. Трэці эпізод — падзеі ночы 27 сакавіка ў Кастрычніцкім РУУС Мінска, дзе Бандарэнка нагой спачатку выбіў тэлефон з рук Радзівон, якая фатаграфавала яго, а затым таксама нагой ударыў у твар маці Радзівон Наталлю Травульку. Ва ўсіх выпадках Андрэй Бандарэнка быў нецвярозы і, як сцвярджае следства, дзейнічаў з хуліганскіх меркаванняў і з асаблівым цынізмам.
Абвінавачаны і яго адвакат не пагадзіліся з такой кваліфікацыяй дзеянняў. Сам Бандарэнка на судзе некалькі разоў прасіў прабачэння ў пацярпелых, прызнаваў сваю віну па другім і трэцім эпізодах, выказваў гатоўнасць кампенсаваць маральны і матэрыяльны ўрон Радзівон і Травульцы. Яны ж ніякіх пазоваў не заяўлялі, але гаварылі, што не маюць мэты ізаляваць Бандарэнку ад грамадства.
Сваякі і абарона Бандарэнкі маюць намер абскардзіць сённяшняе рашэнне Мінгарсуда.
Што за Дзмітрый Скіндзераў, які абвясціў вайну Ціханоўскай? Супрацоўніцтва з ГУБАЗіКам, даўгі ў Беларусі, даўгі ў Літве37
Каментары