За раздачу ўлётак аб палітвязнях 24 лістапада ў Полацку затрыманы актывіст аргкамітэта па стварэнні партыі «Беларуская хрысціянская дэмакратыя» Андрэй Гайдукоў. Улёткі, якія яшчэ заставаліся ў былога палітвязня на момант затрымання, канфіскаваныя.
Актывіста абвінавачваюць у правядзенні несанкцыянаванага пікета. Перад гэтым быў затрыманы малады чалавек, які фатаграфаваў, як Гайдукоў раздаваў улёткі.
Гэта другое за апошнія некалькі дзён затрыманне Гайдукова. У мінулую пятніцу, 21 лістапада, яго затрымлівалі за раздачу ўлётак у Наваполацку. У міліцыі на яго склалі адміністрацыйны пратакол за арганізацыю і правядзенне несанкцыянаванага масавага мерапрыемства (частка 1 артыкула 23.34 Кодэкса аб адміністрацыйных правапарушэннях), пасля чаго адпусцілі.
Гайдукоў правёў у зняволенні паўтара года — з лістапада 2012 года па май 2014-га. Паводле інфармацыі следства, ён быў затрыманы «ў момант закладкі тайніка са звесткамі, якія цікавяць замежныя спецслужбы», і першапачаткова абвінавачваўся па арт. 356 Крымінальнага кодэкса (здрада дзяржаве ў форме правядзення агентурнай дзейнасці), пазней абвінавачанне было перакваліфікаванае. 1 ліпеня 2013 года Віцебскі абласны суд прызнаў Андрэя Гайдукова вінаватым па ч. 1 арт. 14 і арт. 356-1 Крымінальнага кодэкса (замах на ўстанаўленне супрацоўніцтва са спецыяльнай службай, органам бяспекі або разведвальным органам замежнай дзяржавы) і прыгаварыў да паўтара года пазбаўлення волі. Судовы працэс праходзіў у закрытым рэжыме. Беларускія праваабаронцы выступілі з сумеснай заявай, у якой прызналі Андрэя Гайдукова палітзняволеным.
Цяпер чытаюць
Чаму амерыканцы так ірвуцца на Месяц, што там будуць здабываць? І што да таго беларусам? Тлумачыць беларускі астрафізік6
Каментары