У Мінску прэзентавалі серыю гадзіннікаў з нацыянальным арнаментам «Спадчына» ФОТА
Лімітаваная серыя «Спадчына» мінскага гадзіннікавага завода «Прамень» утрымлівае па 50 адзінак кожнага з шасці варыянтаў мужчынскіх гадзіннікаў.
Прэзентацыя прайшла 22 лютага падчас фестываля «Дзень роднай мовы».
У хуткім часе гадзіннікі, створаныя ў межах праекту Hay.by і вырабленыя на заводзе «Прамень», з’явяцца ў продажы. Таксама стваральнікі абяцаюць выпусціць жаночы варыянт.
Гадзіннікі ўтрымліваюць японскі механізм (як кварцавы, так і з аўтадаводам), яны зробленыя з нержавеючай сталі і натурыльнай скуры.
«Калісьці я працавала на заводзе — выкладала супрацоўнікам англійскую мову. Сама зацікавілася тэмай гадзіннікаў, гісторыяй «Прамяня». З сябрамі прыйшлі да ідэі замовіць серыю гадзіннікаў з беларускім арнаментам», — распавяла адна з удзельніц праекту Вераніка Мазуркевіч.
Гадзіннікі будуць прадавацца на сайце Hay.by, цана пакуль невядомая. Паралельна з калекцыяй «Спадчына» праект Hay.by прапануе серыю гадзіннікаў «Маштоц» з матывамі старажытнага армянскага алфавіту.
Каментары