На аднаго з удзельнікаў акцыі прадпрымальнікаў заведзена крымінальная справа
Андрэя Кіма вінавацяць у тым, што ён ударыў супрацоўніка ДАІ і расьсек яму брыво да крыві.
Паводле гэтага артыкулу Андрэю пагражае ад трох месяцаў да шасьці гадоў зьняволеньня. Хлопец пакуль знаходзіцца ў спэцпрыёмніку‑разьмеркавальніку на Акрэсьціна, дзе адбывае адміністрацыйны арышт. 22 студзеня ён быў пакараны, паводле двух пратаколаў, судом Цэнтральнага раёну Менску (судзьдзя – Тацяна Паўлючык) 10 суткамі адміністрацыйнага арышту, а таксама 1 млн 050 рублямі штрафу.
Маці Андрэя кажа, што пасьля затрыманьня яго завезьлі ў РУУС Цэнтральнага раёну Менску, дзе завялі дзьве адміністрацыйныя справы і адну крымінальную. Пазьней крымінальная была перададзеная ў раённую пракуратуру.
Паводле яе словаў, сьледчы пракуратуры Лугін сказаў, што маюцца відэаматэрыялы злачынства. Нібыта Андрэй Кім падчас сутычкі каля ГУМу ўдарыў супрацоўніка ДАІ кулаком у твар і расьсек таму брыво да крыві. Андрэй сваю віну адмаўляе.
У пракуратуры ад камэнтароў адмовіліся, нават не пацьвердзіўшы, ці заведзена крымінальная справа ў дачыненьні да Андрэя Кіма.
У дадзены момант родныя і сябры Андрэя шукаюць відэаматэрыялы таго інцыдэнту каля ГУМУ, каб прадставіць у пракуратуру ў якасьці доказу невінаватасьці хлопца.
Цяпер чытаюць
Скандал у полацкай школе: маці сцвярджае, што яе сына збілі на трэніроўцы па дзюдо — так хлопца «выхоўваў» трэнер5
Каментары