Жаданне адпачыць у Крыме не з'яўляецца падставай для ўезду замежных грамадзян на паўвостраў.
Пра гэта заявіў прэс-сакратар Дзяржаўнай міграцыйнай службы Украіны Сяргей Гунько на брыфінгу ў Кіеве.
«У дачыненні да замежнікаў. Пастановай Кабміна дакладна вызначаныя падставы, на якіх замежнікі могуць атрымаць такі дазвол і, адпаведна, ісці, падарожнічаць на Крымскі паўвостраў. Жаданне адпачыць у Крыме не з'яўляецца падставай для ўезду замежніка на Крымскі паўвостраў на сённяшні дзень», — сказаў ён.
«Падставамі з'яўляюцца выключна пражыванне блізкіх сваякоў на тэрыторыі Крыма, размяшчэнне пахавання блізкіх сваякоў на тэрыторыі Крыма, смерць блізкага сваяка, а таксама наяўнасць правоў уласнасці на тэрыторыі Крыма», — дадаў Гунько.
Таксама, паводле яго слоў, сярод падстаў атрымання дазволу з'яўляецца ажыццяўленне дыпламатычных функцый, абарона нацыянальных інтарэсаў Украіны, але гэта па ўзгадненні з МЗС.
Як паведаміў Гунько, усяго з пачатку дзеяння пастановы ў міграцыйную службу звярнулася каля 500 замежнікаў за атрыманнем такога дазволу, і ўжо выдадзена каля 350 такіх дазволаў.
Каментары