Але да акупальнасці грамадскага транспарту яшчэ далёка.
Новая сістэма аплаты праезду, што ўжо год дзейнічае ў сталічным грамадскім транспарце, дазволіла прапанаваць значна больш тарыфаў, дазволіла зэканоміць на кандуктарах, аптымізаваць маршрутную сетку і павялічыць зборы па штрафах, распавяла агенцтву «Мінск-Навіны» намеснік гендырэктара «Мінсктранса» Ірына Якубоўская.
Сума штрафаў у першай палове 2015 года вырасла на 30% у параўнанні з аналагічным перыядам 2013 года, калі валідатараў яшчэ не было. Кантралёр проста адключае магчымасць тэрмінова аплаціць праезд пры пачатку праверкі аплаты.
Агулам за паўгода ў Мінску была аштрафаваная амаль 51 тысяча чалавек. За праезд дагэтуль не плацяць каля 13% пасажыраў, яшчэ 7% плацяць раз-пораз.
Разам з вывядзеннем са штату «Мінсктранса» кандуктараў амаль удвая павялічылася колькасць кантралёраў, падвысілася інтэнсіўнасць праверак. Правы і абавязкі апошніх не змяніліся, але прадпрыемства прапрацоўвае пытанне аб больш цеснай супрацы з міліцыяй дзеля забеспячэння парадку на транспарце.
Міністэрства транспарту рыхтуе павелічэнне штрафаў за безбілетны праезд і ўзмацненне адказнасці за правапарушэнні на транспарце.
Магчымыя змены прадстаўнік «Мінсктранса» не пракаментавала, але адзначыла, што прадпрыемства не раз прапаноўвала міністэрству павялічыць штраф з 0,5 базавай велічыні (сёння 90 тысяч рублёў) да 1 базавай велічыні, а кантралёрам даць права адміністрацыйнага затрымання безбілетнікаў.
Акупальнасць транспарту за першыя 5 месяцаў гэтага года павысілася: на 2,2% на трамваях, на 3,6% на тралейбусах, на 8,2% на аўтобусах, агулам — на 6,6%. Але да поўнай акупальнасці далёка: сабекошт праезду складае каля 9400 рублёў, а звычайны квіток каштуе 4500.
Сёння «Мінсктранс» аналізуе ідэю дыверсіфікацыі аплаты праезду ў горадзе ў залежнасці ад дальнасці (далей едзеш — больш плаціш). Такая сістэма ўжо дзейнічае ў прыгарадных маршрутах, але для яе ўвядзення ў горадзе пакуль недастаткова звестак па паездках карыстальнікаў бескантактных картак.
Чытайце таксама: У Мінску валідатар каштуе даражэй за iPhone — 727 долараў, у тэндары ўдзельнічалі дзве роднасныя кампаніі
Каментары