У сувязі з пажарам у кабельным калектары «Няміга» 4 снежня адбылося ўзгаранне ізаляцыі сілавых кабеляў, у тым ліку кабелю сувязі кіравання святлафорнымі аб'ектамі.
З-за гэтай прычыны, як паведамляе ўпраўленне ДАІ ГУУС Мінгарвыканкама, будзе адсутнічаць рэжым каардынаванага кіравання святлафорамі («зялёная хваля») па вуліцы Няміга.
Дзяржаўтаінспекцыя рэкамендуе кіроўцам па магчымасці выключаць гэты ўчастак дарог са свайго маршруту з-за магчымых цяжкасцяў пры руху.
Нагадаем, паводле звестак МНС, паведамленне аб пажары паступіла ад прахожага ў 5.46, з люка кабельнага калектара ішоў дым сярэдняй канцэнтрацыі. Падчас разведкі ратавальнікі ўстанавілі, што ў кабельным калектары «Няміга» здарылася ўзгаранне ізаляцыі сілавых кабеляў. Пацярпелых не было.
Пасля зняцця напружання з усіх ліній пачалося тушэнне пажару, ён быў ліквідаваны ў 9.20. У выніку пажару аказалася пашкоджана 15 метраў кабеляў, прыналежнасць якіх устанаўліваецца. Раней аб праблемах з доступам да паслуг заявілі аператар кабельных сетак «Космас ТБ» і інтэрнэт-правайдар «Дзелавая сетка». Паводле папярэдніх звестак, у выніку пажару пашкоджана 14 кабельных ліній РУП «Мінскэнерга» і дзве кабельныя лініі ДП «Мінсктранс», якія сілкуюць кантактную сетку тралейбусаў. Абаненты гарадскіх тэлефонных сетак і карыстальнікі валаконна-аптычных ліній сувязі пераведзеныя на рэзервовыя маршруты, наяўнасць пашкоджанняў устанаўліваецца.
Паводле інфармацыі МНС, унутры калектара знаходзяцца камунікацыі 19 арганізацый.
Каментары