У Мінску адбылося падвойнае забойства.
Пра гэта паведамляе прэс-служба ГУУС Мінгарвыканкама.
20 снежня ў 7:13 у кватэры жылога дома па Алібегава з множнымі нажавымі раненнямі шыі і цела былі знойдзены трупы мужчыны і жанчыны. Па целе мужчыны было нанесена каля 50 удараў нажом, па целе жанчыны — больш за 30.
У ходзе аператыўна-вышуковых мерапрыемстваў міліцыя ўстанавіла, што да здзяйснення злачынства датычныя двое маладых людзей, якіх наняла за 5 мільёнаў рублёў былая блізкая сяброўка маладога чалавека.
Такім чынам яна хацела адпомсціць новай дзяўчыне свайго былога маладога чалавека. Яна не прасіла забіваць саперніцу, а хацела «адправіць» у бальніцу тыдні на два, каб у гэты час паспрабаваць наладзіць адносіны з маладым чалавекам. Выканаўцы «перашчыравалі» і забілі абодвух.
***
Як паведаміла ў сваім фэйсбуку афіцыйны прадстаўнік Следчага камітэта Юлія Ганчарова, крымінальная справа аб падвойным забойстве ў Маскоўскім раёне сталіцы расследуецца Галоўным следчым упраўленнем.
Па даручэнні следства супрацоўнікамі міліцыі праведзены комплекс аператыўна-вышуковых мерапрыемстваў, у ходзе якіх затрымана чацвёра падазраваных, сярод якіх адна жанчына (мужчыны 1972, 1984, 1992 гадоў нараджэння, жанчына 1989 нараджэння).
У ходзе следства будуць устаноўлены ўсе абставіны і матывы здзейсненага злачынства, а таксама роля кожнага з затрыманых у яго здзяйсненні.
Варта адзначыць высокі ўзровень узаемадзеяння ўсіх службаў і падраздзяленняў, якія ажыццяўляюць работу па гэтай крымінальнай справе, дадала Юлія Ганчарова.
Каментары