Пасля таго, як яе затрымалі за язду нападпітку, яна паспрабавала збегчы.
Як паведамляе прэс-служба ДАІ Брэсцкай вобласці, інцыдэнт адбыўся ў горадзе над Бугам рана раніцай 6 лютага. Каля паловы на пятую на вуліцы Піянерскай увагу супрацоўнікаў ДАІ прыцягнуў аўтамабіль «Фольксваген Пола». Кіроўца неадэкватна сябе паводзіў — «віхляў» па дарозе з боку ў бок. Потым машына раптам спынілася на прыпынку грамадскага транспарту «Кіеўская». Інспектары паспяшаліся да аўтамабіля, дзе ўбачылі за рулём маладую дзяўчыну, ад якой пахла алкаголем.
Прад'яўляць пасведчанне кіроўцы і дакументы на аўтамабіль дзяўчына катэгарычна адмовілася, сказаўшы, што машыну «ўзяла пакатацца ў маладога чалавека». Выявілася, што «Пола» належыць аднаму з брэсцкіх прадпрыемстваў. Гаспадар у гэты час быў «недаступны».
Дзяўчына паводзіла сябе агрэсіўна, а пасля таго як яе пасадзілі на задняе сядзенне патрульнага аўтамабіля, яна вырашыла збегчы, выбіўшы нагамі шкло. Аднак ўцёкі не ўдаліся. Пасля выкліку следча-аператыўнай групы, дзяўчыну даставілі ў наркалогію, дзе ў яе выявілі 0,87 праміле алкаголю.
Як высветлілася, «хуліганка» — 22-гадовая жыхарка Маларыцкага раёна, якая ніколі не мела пасведчання кіроўцы. Начное падарожжа для яе скончылася ў Маскоўскім РАУС. У дачыненні дзяўчыны былі складзеныя адразу 3 адміністрацыйныя пратаколы — за п'яную язду, знаходжанне за рулём без права кіравання і непадпарадкаванне законнаму патрабаванню службовай асобы.
Аўтамабіль быў пастаўлены на штрафную стаянку.
Цяпер чытаюць
Беларуска распачала чэлендж «40 спатканняў», але ўжо на сярэдзіне не хавае расчаравання ў мужчынах45
Каментары