КДБ: Чыж спрабаваў уцячы з краіны, ён ехаў на хуткасці 220 км/г у бок літоўскай мяжы
Пра гэта паведаміў сёння журналістам кіраўнік Камітэта дзяржаўнай бяспекі Валерый Вакульчык.
Валерый Вакульчык распавёў пра падрабязнасці справы Юрыя Чыжа. Ён адзначыў, што бізнэсмен стварыў фіктыўную фірму ў Расіі. Адзіным работнікам фірмы і яе ж дырэктарам, паводле інфармацыі КДБ, быў маскоўскі кіроўца Чыжа. Гэтай фірме «Трайпл» плаціў нібыта за выкарыстанне таварнага знака. Грошы абнаяўнівалі і перадавалі праз касіра самому Чыжу.
— Усё нашмат прасцей, чым многія думаюць. Улетку 2015 года ў КДБ з заявай аб супрацьпраўнай дзейнасці Япрынцава звярнуліся Чыж і два яго партнёры з РФ, — распавёў Валерый Вакульчык. — У ходзе расследавання Япрынцава і іншых былі атрыманыя доказы па ўхіленні ад выплаты падаткаў групы кампаній «Трайпл».
11 сакавіка былі атрыманы прамыя доказы датычнасці да дзейнасці Чыжа. Па яго ўказанні была створана фірма, ажыццяўленне фінансава-гаспадарчай дзейнасці якой не меркавалася першапачаткова. Заснавальнікам стаў грамадзянін РФ — памочнік і кіроўца Чыжа.
У 2012 годзе «Трайпл» перадаў гэтай фірме права на таварны знак. Потым фактычна штомесяц, за некалькі месяцаў да падачы справаздачнасці, буйныя грашовыя сумы пераводзіліся «Трайпл» у гэтую фірму пад выглядам выплаты за карыстанне таварным знакам. Гэтыя грошы здымаліся наяўнымі генеральным дырэктарам і адзіным супрацоўнікам гэтай фірмы. Ён перадаваў іх касіру фірмы, а той Чыжу. Схема, знаёмая з часоў Ільфа і Пятрова. Устаноўлена, што такіх фірмаў было досыць шмат.
— Па справе «Трайпл» арыштавана 5 чалавек і адзін затрыманы. Мы можам казаць пра даказаную шкоду, якая вымяраецца мільярдамі рублёў, — адзначыў Вакульчык.
Па словах кіраўніка КДБ, Юрый Чыж спрабаваў бегчы з краіны.
— Ён на велізарнай хуткасці, 220 кіламетраў у гадзіну, накіроўваўся ў бок літоўскай мяжы, потым выехаў на брэсцкую трасу, — адзначыў кіраўнік КДБ. — Мы вымушаныя былі задзейнічаць план «Перахоп», каб яго затрымаць і даставіць у СІЗА.
Чыжа падазраюць ва ўхіленні ад выплаты падаткаў у асабліва буйным памеры. Максімальны тэрмін пакарання па артыкуле — да 7 гадоў пазбаўлення волі.
Каментары