Стаўка рэфінансавання ў Беларусі з 1 мая будзе зніжана на 2 працэнтныя пункты да 22% гадавых, паведамілі ва ўпраўленні інфармацыі і грамадскіх сувязей Нацбанка.
«Праўленне і камітэт па манетарнай палітыцы Нацыянальнага банка 25 красавіка прынялі шэраг рашэнняў у галіне грашова-крэдытнай палітыкі. З 1 мая зніжаюцца: стаўка рэфінансавання — з 24% да 22% гадавых, стаўкі па пастаянна даступных і двухбаковых аперацыях падтрымкі бягучай ліквіднасці банкаў — з 30% да 27% гадавых, стаўкі па пастаянна даступных аперацыях выключэння ліквіднасці банкаў — з 16% да 15% гадавых», — адзначылі прадстаўнікі рэгулятара.
Акрамя таго, з 1 чэрвеня змяншаецца гранічны ўзровень працэнтных ставак па новых тэрміновых банкаўскіх укладах юрыдычных асоб у нацыянальнай валюце, у выпадку перавышэння якога прадугледжваецца павелічэнне рэзервовых патрабаванняў, — з 0,9 да 0,8 стаўкі па пастаянна даступных аперацыях Нацбанка ў форме крэдыту авернайт. Таксама зніжаецца гранічны ўзровень працэнтных ставак па крэдытах, прадастаўленых юрыдычным асобам у беларускіх рублях, у выпадку перавышэння якога ўзмацняецца парадак фарміравання банкамі рэзерву на пакрыццё магчымых страт па спецыяльных партфелях аднародных крэдытаў, — з 1,1 да 1 стаўкі па пастаянна даступных аперацыях Нацбанка ў форме крэдыту авернайт.
Як растлумачылі ва ўпраўленні, рашэнні, накіраваныя на зніжэнне велічыні перавышэння намінальнымі працэнтнымі стаўкамі ўзроўню фактычнай і прагназуемай інфляцыі. Нацбанк прыняў «з улікам існуючай фактычнай сітуацыі, ацэнак на бліжэйшую перспектыву і аналізу існуючых рызык у эканоміцы і грашова-крэдытнай сферы».
У далейшым рэгулятар прадоўжыць рэалізацыю стратэгіі па зніжэнні рызык-прэміі, закладзенай ва ўзроўні працэнтных ставак, з улікам комплекснага аналізу існуючых макраэканамічных рызык і прагнозу развіцця эканомікі Беларусі, адзначылі спецыялісты.
У Нацбанку канстатавалі, што запаволенне тэмпаў росту грашовай масы, фарміраванне чыстага прапанавання валюты на ўнутраным валютным рынку, нармалізацыя сітуацыі на дэпазітным рынку абумоўліваюць змяншэнне інфляцыйнага націску ў краіне.
Спецыялісты звярнулі ўвагу на даныя Белстата, згодна з якімі спажывецкія цэны ў сакавіку бягучага года выраслі на 0,8% (іх сярэднямесячны прырост за папярэднія тры месяцы склаў 2%). У адносінах да сакавіка 2015 года спажывецкія цэны павялічыліся на 12,8%, базавая інфляцыя (інфляцыя за вылікам адміністрацыйна рэгуляваных цэн і цэн на плодаагароднінную прадукцыю) склала 11,8%.
«У бліжэйшыя месяцы чакаецца далейшае зніжэнне тэмпаў росту цэн», — прагназуюць прадстаўнікі рэгулятара. Пры гэтым, падкрэслілі ў Нацбанку, працэнтныя стаўкі па рублёвых крэдытах і дэпазітах захоўваюцца на высокім дадатным узроўні, у тым ліку ў рэальным выражэнні. У сакавіку гэтага года стаўка па новых рублёвых крэдытах склала 33,4% гадавых, па тэрміновых дэпазітах — 24,3% гадавых, што істотна перавышае ўзровень інфляцыі.
У Беларусі апошні раз стаўка рэфінансавання змянялася 1 красавіка. Тады яна была зніжана на 1 працэнтны пункт. Да гэтага ў краіне стаўку рэфінансавання змянялі толькі 9 студзеня 2015 года, калі яна была павялічана на 5 працэнтных пунктаў.
Цяпер чытаюць
У чым прычына незадаволенасці жыхароў мікрараёна Лебядзіны ў Мінску? Вось што насамрэч там планавалі будаваць6
Каментары