Спікер ніжняй палаты парламенты Бразіліі Валдзір Маранья адмяніў вынікі галасавання па імпічменту прэзідэнту краіны Дылме Русеф.
Сваё рашэнне Маранья патлумачыў тым, што галасаванне 17 красавіка было праведзена з працэсуальнымі парушэннямі. Паводле яго, дэпутаты не павінны былі да галасавання заяўляць пра сваё рашэнне, а лідэры партый — раіць дэпутатам, як лепш прагаласаваць.
Ён заявіў, што можа быць праведзена яшчэ адно галасаванне.
У красавіку бразільскі парламент падтрымаў імпічмент Русеф: за гэта рашэнне прагаласавала дзве траціны дэпутатаў, што з'яўляецца неабходнай умовай для адстаўкі.
У сераду павінна было прайсці агульнае галасаванне сената па гэтым пытанні. Рашэнне спікера фактычна адмяняе гэта галасаванне.
Пакуль не ясна, ці можа вярхоўны суд краіны адмяніць рашэнне спікера.
Маранья выступаў супраць імпічменту Русеф. Пры гэтым Прагрэсіўная партыя, у якую ён уваходзіў, падтрымала адстаўку прэзідэнта.
Палітычны крызіс у Бразіліі доўжыцца ўжо некалькі месяцаў. Русеф абвінавачваюць ва ўтойванні інфармацыі пра дэфіцыт бюджэту напярэдадні прэзідэнцкіх выбараў 2014 года. Сама Русеф заяўляе, што яна не вінаватая, а сваіх супернікаў абвінавачвае ў палітычным махлярстве.
Цяпер чытаюць
Яму выбілі чатыры зубы, а пасля выкінулі з краіны. Цяпер былога палітвязня арыштавалі ў Латвіі з шасцю мігрантамі ў машыне14
Каментары