Улады еўрапейскіх краін не павінны адпраўляць у турму мігрантаў толькі за тое, што яны незаконна заехалі ў краіну, пастанавіў Cуд Еўрасаюза ў Люксембургу.
У рашэнні гаворыцца, што замест гэтага нелегальных мігрантаў трэба адправіць назад у дзяржаву, з якой яны прыехалі.
«Дырэктыва аб вяртанні не дазваляе змяшчаць у турму грамадзяніна краіны, якая не ўваходзіць у ЕС, які да гэтага не падпадаў пад працэдуру выправаджэння, толькі за тое, што ён ці яна трапіў(ла) на тэрыторыю сябра Саюза незаконна, праз унутраную мяжу шэнгенскай зоны», — гаворыцца ў рашэнні люксембургскага суда.
У рашэнні гаворыцца, што аналагічнае правіла дзейнічае, калі мігранта затрымалі, калі ён пакідаў шэнгенскую зону. Пастанова суда не закране Брытанію і Ірландыю, якія не ўваходзяць у шэнгенскую зону, а таксама Данію, якая абараніла права не выконваць рашэнні Суда Еўрасаюза.
Рашэнне было прынята на падставе прэцэдэнту з афрыканскай мігранткай, якую французская паліцыя затрымала за выкарыстанне фальшывых бельгійскіх дакументаў каля тунэлю пад Ла-Маншам і ўзяла пад варту, абвінаваціўшы ў незаконным уездзе ў краіну.
Селіна Афум аспрэчыла гэтае рашэнне на падставе дырэктывы ЕС, якая дае нелегальнаму мігранту 30 дзён на тое, каб добраахвотна пакінуць краіну. У дырэктыве гаворыцца, што выправаджэнне не павінна адбывацца «з ужываннем празмернай сілы», а таксама падвяргаць жыццё мігранта небяспецы.
Французскі касацыйны суд адправіў скаргу Афум на разгляд у Суд Еўрасаюза, які з'яўляецца вярхоўным судовым органам ЕС.
У пастанове Cуда Еўрасаюза таксама агаворваецца некалькі важных умоў.
У ім гаворыцца, што мігранты могуць быць затрыманыя на тэрмін да 18 месяцаў, калі маецца «рызыка парушэння рашэння аб высылцы з краіны», што можна інтэрпрэтаваць як імавернасць таго, што затрыманы схаваецца ад правасуддзя.
Затрыманне таксама дазваляецца ў выпадку, калі чалавеку быў выдадзены ордар аб выдварэнні, але ён адмовіўся яго выконваць, або ў выпадку, калі чалавека ўжо дэпартавалі, а ён паспрабаваў зноў незаконна пранікнуць у краіну.
Цяпер чытаюць
Удава Мікіты Мелказёрава ўпершыню публічна расказала пра ноч яго смерці6
Удава Мікіты Мелказёрава ўпершыню публічна расказала пра ноч яго смерці
Унікальныя здымкі будаўніцтва Старога моста ў Гродне. Хто фатаграфаваў небяспечныя кесоны, у якіх людзі рызыкавалі на дне Нёмана, каб паставіць апоры? ШМАТ ФОТА77
Каментары