Адвентысты сёмага дня, якія не з'явіліся на ЦТ у суботу, не змогуць прайсці тэставанне ў рэзервовы дзень. Такое рашэнне прынята сёння на пасяджэнні рабочай групы па забеспячэнні дзейнасці дзяржаўнай камісіі па кантролі за ходам падрыхтоўкі і правядзення ўступных выпрабаванняў ва ўстановах вышэйшай і сярэдняй спецыяльнай адукацыі, дзе разглядаліся праблемныя пытанні, звязаныя з правядзеннем уступнай кампаніі, паведамілі ў прэс-службе ўрада.
Адным з пытанняў, вынесеных на абмеркаванне, стаў зварот старэйшага біскупа (старшыні) РРА «Канферэнцыя цэркваў хрысціян адвентыстаў сёмага дня ў Рэспубліцы Беларусь» Вячаслава Бучнева з просьбай даць магчымасць прыхаджанам яго царквы, якія па рэлігійных перакананнях не з'явіліся на цэнтралізаванае тэставанне ў суботнія дні (18 чэрвеня — біялогія і 25 чэрвеня — замежная мова), прайсці тэставанне ў рэзервовы дзень.
«У ранейшыя гады дзяржкамісія ішла насустрач такім абітурыентам і ў парадку выключэння давала падобную магчымасць, якая не можа трактавацца як штогадовая норма. Пра гэта, а таксама пра тое, што падобныя звароты надалей дзяржкамісіяй разглядацца не будуць, царква была пісьмова папярэджаная летась, — звярнулі ўвагу ў прэс-службе. — У рэспубліцы ўстаноўлены адзіны парадак правядзення цэнтралiзаванага тэставання, які не можа падладжвацца пад асаблівасці ўсіх веравызнанняў».
Падставамі для ўдзелу ў цэнтралізаваным тэставанні ў рэзервовы дзень, адзінымі для ўсіх абітурыентаў, з'яўляюцца толькі «хвароба або іншыя непрадбачаныя абставіны, якія перашкаджаюць удзелу ў цэнтралізаваным тэставанні і пацверджаныя дакументальна» (пункт 16 Палажэння аб парадку арганізацыі і правядзення цэнтралізаванага тэставання, зацверджанага пастановай Савета Міністраў ад 6 чэрвеня 2006 года №714).
Таксама адзначалася, што ўступныя выпрабаванні з'яўляюцца пачатковым этапам атрымання вышэйшай адукацыі. Пры навучанні прадугледжана правядзенне вучэбных заняткаў і практыкі ў тым ліку ў суботнія дні.
У сувязі з гэтым было прынята рашэнне адмовіць Вячаславу Бучневу ў задавальненні яго просьбы.
-
Лукашэнка запатрабаваў ад міністра абароны вызначыць умацаваныя раёны, якія будуць занятыя на працягу сутак
-
Таксістка з Таджыкістана насмерць збіла беларуску ў Польшчы — і спакойна пакінула краіну
-
У Ізраілі, імаверна, затрымалі былога выкладчыка духоўнага вучылішча, які жанаты з маладзейшай за яго на 30 год студэнткай
Цяпер чытаюць
Таксістка з Таджыкістана насмерць збіла беларуску ў Польшчы — і спакойна пакінула краіну16
Каментары