Газета «Вечерній Могілёв» сёння ўзарвала беларускі інтэрнэт, надрукаваўшы 10 прычын, чаму трэба пагарджаць Хэлоўінам па версіі Мікалая Лайшы — псіхатэрапеўта Магілёўскай абласной псіхіятрычнай бальніцы.
Што доктар мае супраць дня, у якім моладзь бачыць проста чарговую нагоду патусавацца?
Прыводзім скарочаныя довады псіхатэрапеўта.
1) «Свята носіць рэлігійны паганскі антыхрысціянскі характар, удзел у ім хрысціян недапушчальны», — мяркуе доктар.
2) «Назва Хэлоўіна як Дня ўсіх святых не адпавядае сутнасці свята, — піша ён. — Каталіцкае свята ўсіх святых змяшалася з паганскім і падарыла яму сваю назву. Падобнымі рудыментамі паганства ў нашай краіне з'яўляюцца г.зв. калядкі на Каляды і Купалле ў дзень Святога прарока Прадцечы і Хрысціцеля Гасподняга Іаана».
3) «Надзяваць гарбуз замест галавы — прывілей людзей без галавы».
4) «Удзел у Дні ўсіх Святых вядзе да дэмаралізацыі свядомасці, асабліва ў дзяцей і падлеткаў», — мяркуе Лайша і дадае, што пры святкаванні нібыта адбываецца падмена і перакручванне чалавечых уяўленняў пра дабро і зло, прыгажосць і бязладдзе, праўду і хлусню.
5) «Дзень усіх Святых робіць яго ўдзельнікаў халуямі Захаду і д'ябла, — сцвярджае доктар. — Ажыццяўляецца навязванне англамоўнай псеўдакультуры і ладу жыцця, агрэсіўная экспансія сумнеўных «забаў», рэстаўрацыя старажытных культаў служэння сілам зла пад выглядам «д'ябальскага карнавала».
6) «Псіхічныя расстройствы і апантанасць. Дзіцячыя страхі, неўрозы, псіхічныя парушэнні, нематываваная агрэсія, начныя кашмары, «галасы», апантанасць бесамі — вось «пабочныя эфекты» Хэлоўіна», — піша доктар і сцвярджае, што псіхічна і духоўна здаровы чалавек не будзе пераапранацца ў нечысць.
7) «Удзел у Дні ўсіх Святых вядзе да ўхвалення культу смерці замест культу жыцця», — доктар выступае супраць зняцця табу на агіду ад «костак», «чэрапаў», «трун», і «прыкольных цукерак з экскрэментаў».
8) «Укараненне ў свядомасць дзяцей і моладзі тэмы смерці спрыяе росту самагубстваў. Настойлівае ўкараненне ў свядомасць дзяцей і моладзі тэмы смерці, памірання, нікчэмнасці жыцця прывяло да таго, што Расія, якая ў пачатку XX стагоддзя была на апошнім месцы ў свеце па колькасці самагубстваў, і перш за ўсё дзіцячых, цяпер аказалася на верхніх прыступках гэтай страшнай статыстыкі. Пры гэтым дзіцячыя суіцыды ўсё часцей набываюць групавы характар, і ніжняя іх мяжа — узрост 5-6 гадоў!» — піша магілёўскі псіхатэрапеўт і падкрэслівае, што расійская статыстыка характэрная і для Беларусі.
9) «Хэлоўін — прыбытковы бізнэс, што нішчыць кашалькі бацькоў», — у абарону гэтага тэзісу доктар піша, што хаця лічбы выдаткаў на святкаванне Хэлоўіна ў Беларусі невядомыя, у ЗША яны складаюць да $2,5 млрд.
10) «Праваслаўная Царква і іншыя канфесіі раяць адмовіцца ад удзелу ў святах тыпу Хэлоўін», — падсумоўвае Мікалай Лайша.
Пакуль што інтэрнэт рэагуе на публікацыю каментарамі ў духу «як часта псіхатэрапеўту даводзілася сустракацца на прыёмах з апантанымі бесамі?» і «што ж цяпер рабіць з «машчамі» праваслаўных святых, якія таксама не вельмі жывыя».
Каментары