Еўрасаюз разгледзіць магчымасць зніжэння роўмінгавых тарыфаў для шасці краін Усходняга партнёрства, у тым ліку і Беларусі. Праўда, вынікаў можна чакаць не раней за 2020 год.
Гэтая ініцыятыва з'явілася пасля поўнай адмены роўмінгу паміж краінамі Еўрасаюза ў чэрвені. Цяпер для грамадзян ЕС сувязь у іншых краінах каштуе столькі ж, як і ў «хатняга аператара».
Цяпер у Еўрасаюзе прапрацоўваюць магчымасць адмяніць павышаныя тарыфы ў ЕС і для жыхароў краін «Усходняга партнёрства» — Беларусі, Грузіі, Арменіі, Азербайджана, Малдовы і Украіны.
«Калі вы з грузінскім нумарам паедзеце ў Бельгію, то не павінны там выдаткоўваць на званкі больш, чым у Грузіі», — тлумачыў Барыс Ярашэвіч, кіраўнік падраздзялення Еўрапейскай службы знешніх спраў, якое працуе з Усходнім партнёрствам, рэгіянальным супрацоўніцтвам і АБСЕ.
У каментары для TUT.BY Ярашэвіч растлумачыў, што на дадзеным этапе адмена роўмінгавых плацяжоў — гэта толькі праект. «Спатрэбіцца час, каб ажыццявіць яго, калі гэта наогул адбудзецца», — адзначыў ён. Цяпер, паводле яго слоў, праводзіцца даследаванне аб роўмінгу. Па яго выніках да канца 2017 года будуць выдадзеныя рэкамендацыі для краін Усходняга партнёрства.
«Першым крокам могуць стаць гарманізаваныя тарыфы на сувязь у роўмінгу, а таксама зніжэнне тарыфаў у роўмінгу паміж шасцю краінамі Усходняга партнёрства (і пакуль не ў ЕС). Гэта можа быць дасягнута да 2020 года», — сказаў супрацоўнік Еўрапейскай службы знешніх спраў.
Па словах чыноўніка, перш чым распаўсюджваць зніжаныя роўмінгавыя тарыфы Еўрасаюза на іншыя краіны, трэба ацаніць эфект ад адмены ўнутранага роўмінгу ЕС. Гэта зробяць на працягу 2018 года.
«Таму на дадзены момант мы не можам анансаваць якую-небудзь дарожную карту ў адносінах да пагаднення паміж ЕС і шасцю краінамі Усходняга партнёрства, — падкрэсліў Ярашэвіч. — Калі такое пагадненне ажыццявіцца, хутчэй за ўсё, гэта адбудзецца пасля 2020 года».
Нагадаем, Беларусь цяпер рухаецца да адмены роўмінгу яшчэ і з Расіяй. У канцы чэрвеня гэтую ідэю падтрымаў Аляксандр Лукашэнка, а ў ліпені ў расійскую Дзярждуму ўнеслі адпаведны законапраект. Удзельнікі рынка тады адзначалі, што без адміністрацыйнага рэсурсу адмяніць роўмінг паміж дзвюма краінамі будзе вельмі складана.
Цяпер чытаюць
Беларус, які ваяваў за Украіну, распавёў, чым яго зачаравала каханка Іна Кардаш, агентка КДБ23
Беларус, які ваяваў за Украіну, распавёў, чым яго зачаравала каханка Іна Кардаш, агентка КДБ
Агентка Кардаш выкарыстоўвала сэкс, каб збіраць інфармацыю пра каліноўцаў і завербаваць украінскага камандзіра. А куратару КДБ пісала пра яго: «Мой лох»3030
Агентка Кардаш выкарыстоўвала сэкс, каб збіраць інфармацыю пра каліноўцаў і завербаваць украінскага камандзіра. А куратару КДБ пісала пра яго: «Мой лох»30
Учора — у лукашэнкаўскай турме, сёння — у Кіеве дапамагае ўкраінцам выжыць. Былы палітвязень і сваяк Ціханоўскай стаў валанцёрам у Пункце нязломнасці66
Каментары