Селін Дыён абвясціла пра канцэрты ў рамках свайго вяртання пасля цяжкай хваробы: Я гатовая да гэтага
Канадская спявачка абвясціла пра вяртанне на сцэну — праз чатыры гады пасля таго, як у яе дыягнаставалі невылечнае захворванне, якое паўплывала на яе голас і здольнасць хадзіць, піша Бі-бі-сі.
Спявачка, вядомая дзякуючы такім хітам, як My Heart Will Go On і Because You Loved Me, дасць серыю з 10 канцэртаў на стадыёне ў Парыжы ўмяшчальнасцю 40 тысяч чалавек у верасні і кастрычніку.
Аб'ява была зроблена ў дзень яе 58-годдзя. У паведамленні на сваёй старонцы ў сацсетцы Instagram Дыён назвала сваё вяртанне «найлепшым падарункам у маім жыцці».
«Я так гатовая да гэтага, — сказала яна прыхільнікам. — Я адчуваю сябе добра, я моцная, я ўсхваляваная, і, вядома, крыху нервуюся».
Гаворачы пра свой стан здароўя, Дыён адзначыла: «У мяне ўсё добра, я спраўляюся з хваробай, адчуваю сябе добра. Я зноў спяваю і нават крыху танцую.
«Але я павінна сказаць вам нешта вельмі важнае: за апошнія гады кожны дзень я адчувала вашыя малітвы і падтрымку, вашу дабрыню і любоў».
«Я ўдзячная ўсім вам. Не магу дачакацца, калі зноў вас убачу», — дадала яна.
Вялікі попыт на білеты
Дыён, адна з самых прадаваных выканаўцаў усіх часоў, не выступала з жывымі канцэртамі з часоў шоу ў Ньюарку, штат Нью-Джэрсі, якое прайшло 8 сакавіка 2020 года.
Яе тур Courage быў затым перапынены з-за пандэміі каранавіруса, а пазней у яе дыягнаставалі сіндром цягліцавай скаванасці (рэдкае неўралагічнае аўтаіммуннае захворванне, якое паражае цэнтральную нервовую сістэму), з-за чаго ёй прыйшлося адмяніць усе далейшыя выступы.
Для вяртання на сцэну даты канцэртаў размеркаваныя з інтэрваламі ў некалькі дзён — як мяркуецца, каб пазбегнуць празмернай нагрузкі на здароўе.
Продаж білетаў пачнецца 7 красавіка. Чакаецца велізарны попыт, аднак прыхільнікі могуць зарэгістраваць цікавасць на яе афіцыйным сайце з аўторка, 31 сакавіка.
Планы вяртання спачатку прасачыліся ў прэсу — на мінулым тыдні пра іх напісала франка-канадская газета La Presse.
Неўзабаве пасля гэтага прыхільнікі заўважылі ў Парыжы плакаты з тэкстамі песень Дыён.
У панядзелак увечары, неўзабаве пасля восьмай вечара, Эйфелева вежа загарэлася надпісам «Paris, je suis prête» («Парыж, я гатовая»), а для фанатаў прагучаў плэйліст з песнямі, уключаючы I'm Alive («Я жывая»), Encore Un Soir і My Heart Will Go On.
Дыён таксама запісала французскую версію відэазвароту, у якім абвясціла пра тур; яго транслявалі праз гучнагаварыцелі, пакуль вежа была падсветлена фіялетавым колерам.
Дыён абвясціла, што ў яе дыягнаставаны сіндром цягліцавай скаванасці (SPS), у снежні 2022 года.
У сваім эмацыйным відэа, апублікаваным у Instagram, яна распавяла прыхільнікам, што захворванне паўплывала «на ўсе аспекты паўсядзённага жыцця».
Сіндром цягліцавай скаванасці — малавывучанае прагрэсуючае захворванне, пры якім у розных частках цела пачынаюць адбывацца цягліцавыя спазмы. Гэта прыносіць боль, абмяжоўвае рухомасць пацыента і перашкаджае яму весці звычайны лад жыцця.
Гэтым неўралагічным захворваннем, пры якім сігналы ад нерваў да цягліц працуюць няправільна, хварэюць прыкладна восем тысяч чалавек па ўсім свеце.
Лекаў ад гэтага захворвання не існуе.
У інтэрв'ю Бі-бі-сі ў 2024 годзе Дыён распавяла, што ўпершыню заўважыла сімптомы, калі ў яе пачаліся праблемы з голасам падчас тура.
«Гэта было проста дзіўнае адчуванне, як невялікі спазм», — сказала яна. «Мой голас не спраўляўся, мне даводзілася крыху напружвацца».
Тады яна лічыла немагчымым зрабіць паўзу і спрабавала спяваць у больш нізкім рэгістры, каб знізіць нагрузку на галасавыя звязкі.
«Усе гэтыя канцэрты былі распрададзены на паўтара года наперад, па ўсім свеце.
І я павінна была сказаць людзям: «Прабачце за мой спазм? Прабачце за мае je ne sais quoi? (не ведаю што?)»»
Аднак стан пагоршыўся і, як яна распавяла ў інтэрв'ю NBC News, «часам абцяжарвае хаду і не дазваляе выкарыстоўваць галасавыя звязкі так, як я прывыкла спяваць».
«Гэта як быццам хтосьці душыць цябе. Як быццам хтосьці сціскае тваю гартань ці глотку».
У 2024 годзе яна распавяла французскаму часопісу Vogue пра тыя намаганні, якія робіць, каб справіцца з захворваннем.
«Як я гэта бачу, у мяне ёсць два выбары. Альбо я трэніруюся як спартсмен і працую вельмі старанна, альбо я здаюся — і ўсё скончана», — сказала яна.
«Я выбрала працаваць усім целам і ўсёй душой — з галавы да ног — разам з медыцынскай камандай.
Пяць дзён на тыдзень я праходжу спартыўную, фізічную і вакальную тэрапію. Я працую над пальцамі ног, каленамі, лыткамі, пальцамі рук, сваім спевам і голасам».
Гэтыя намаганні далі вынік. Дыён кранальна вярнулася на сцэну на Алімпійскіх гульнях у Парыжы ў 2024 годзе, выканаўшы класічную песню Эдыт Піяф Hymne à l'Amour з Эйфелевай вежы.
Менавіта гэтая кампазіцыя прагучала першай, калі на Эйфелевай вежы абвясцілі пра яе вяртанне з канцэртамі.
Канадская спявачка даўно адчувае асаблівую прыхільнасць да гэтага горада.
«Калі я ў Парыжы, мне хочацца кахаць мацней», — сказала яна Vogue ў 2024 годзе. «Гэты горад прымушае мяне любіць больш».
Каментары