Гомельскі абласны суд 16 лістапада вынес прысуд жыхару Рэчыцы за ўдзел у ваенных дзеяннях на тэрыторыі замежнай дзяржавы. Разгляд крымінальнай справы быў у дачыненні да Віталя Мітрафанава.
41-гадовага жыхара раённага цэнтра прызналі вінаватым у ідэалагічным наёміцтве без наяўнасці карыслівага складніка (361-3 ч.1 КК РБ). Ён атрымаў два гады «хіміі».
Да ўступлення прысуду ў законную сілу мужчыну адпусцілі з-пад варты і змянілі меру стрымання на падпіску аб нявыездзе. Яго вызвалілі ў зале суда. Час знаходжання пад вартай Мітрафанава залічаць як адзін за два дні абмежавання волі.
Віталь Мітрафанаў знаходзіўся на тэрыторыі ДНР з красавіка па чэрвень 2017 года. Там ён, паводле звестак следства, ахоўваў розныя склады і нёс баявое дзяжурства ва ўзброеным фарміраванні на лініі варагуючых бакоў. У пачатку ліпеня мужчына вярнуўся ў Беларусь, і праз некалькі тыдняў быў затрыманы і ўзяты пад варту.
Абвінавачаны жанаты, раней судзімы. Нягледзячы на тое, што мужчына мае беларускае грамадзянства, ён з'яўляецца выхадцам з расійскага Ніжнявартаўска.
У ходзе судовага пасяджэння Мітрафанаў прызнаў сваю віну і раскаяўся ў зробленым.
Выйшаўшы з залы суда, даваць якія-небудзь каментары журналісту TUT.BY абвінавачаны адмовіўся.
Прысуд у законную сілу не ўступіў і можа быць абскарджаны.
Каментары