«Усе цяжарныя прыйшлі прасіць бласлаўлення ў бацюшкі». Фінал дзённіка з псіхушкі
Публікуем апошнюю частку дзённіка журналісткі Марыны Весялухі пра яе досвед знаходжання ў закрытым жаночым аддзяленні псіхіятрычнай клінікі.
Па спасылках можна нагадаць сабе, што было ў папярэдніх частках:
- Частка 1: «Так, я ў псіхушцы, закрытым жаночым аддзяленні»
- Частка 2: «У мяне забралі тэлефон, завушніцы і нават пазногці»
- Частка 3: «Мой сусвет звузіўся да цёмнага калідора і ложка з тоненькім матрасам…»
- Частка 4: «Лена шле некаму нябачнаму праклёны і б’е яго нагамі»
- Частка 5: «Палата перапоўненая, там ляжыць 16 чалавек»
- Частка 6: «Калі яшчэ будзе магчымасць ляжаць і плакаць?»
— Міленькі, ты ж на мужчыну не падобны. Падстрыжыся!
— Оля, не прыставай да бацюшкі!
Ноччу адной бабцы стала кепска, яна папрасіла бацюшку. Ксёндз толькі на святы прыходзіць. Усе нашы цяжарныя прыйшлі прасіць бласлаўлення. Блаславіў.
****
Сёння мяне, магчыма, выпішуць. Але перад гэтым — прафесарскі агляд. Гэта як дзяржаўны экзамен. Страшна сказаць нешта не тое. Страшна сядзець у чарзе. Потым я даведаюся, што канчатковы дыягназ мне ставіла дачка Аляксея Карпюка.
****
Збіраць рэчы да выпіскі тут кепская прыкмета. Таму не збіраю, але сястра-гаспадыня ўжо прынесла свежую бялізну, каб я заслала свой скрыпучы ложак.
****
Магдалена ўжо дзясяты раз у нашай палаце.
— Пачастуеш мяне чым-небудзь?
— Магдалена, калі мяне канчаткова выпішуць, я табе ўсё аддам.
****
Так, мяне выпісалі. «Цыклатымія» — смяецца загадчыца аддзялення. Так, цыклатымія, і мне з гэтым жыць. З кучай таблетак і дзіўным дыягназам.
****
Кепская прыкмета пакідаць нешта ў псіхушцы, але калі дорыш — адпуста. Я раздарыла ўсё, што ў мяне было: зубную пасту, мыла, гель для душа, туалетную паперу, шампунь (у псіхушцы вельмі кепская вада, таму важна мець добры, бо ў некаторых валасы не расчэсваліся, і яны да мяне хадзілі). Пакінула толькі самае дарагое.
— Аня, вазьмі крэм, тут вада кепская, скура сухая ва ўсіх.
— Ой, дзякуй.
****
— А мо зубную шчотку маеш?
— Магдалена, я табе і так кучу ўсяго аддала. Я ўсё раздала.
— Я не грэбую! Дай!
****
Я ўсё раздала. Нават зубную шчотку аддала Магдалене…
Каментары