Кінакампанія братоў Вайнштэйнаў прададзеная за паўмільярда даляраў. Цяпер яе ўзначаляць жанчыны
Кінакампанія The Weinstein Co., заснаваная братамі Бобам і Харві Вайнштэйнамі, прададзеная за паўмільярда даляраў. Пра гэта паведамляе New York Post.
Новымі ўласнікамі кампаніі сталі мільярдэр Рон Берклі і былая кіраўніца ўпраўлення ЗША па справах малога бізнэсу Марыя Кантрэрас-Світ. Па ўмовах здзелкі, Берклі і Кантрэрас-Світ возьмуць на сябе доўг The Weinstein Co. у памеры 225 мільёнаў даляраў і інвестуюць у кампанію каля 275 мільёнаў даляраў.
«Гэтая здзелка прадугледжвае кампенсацыі ахвярам [дамаганняў] і [далейшую] абарону нашых супрацоўнікаў. <…> Мы лічым яе пазітыўным вынікам ва ўмовах неймаверна складаных абставін», — гаворыцца ў заяве савета дырэктараў The Weinstein Co.
Па словах новых уласнікаў, яны плануюць «стварыць новую кампанію з новым бачаннем», якая будзе дэманстраваць «лепшыя практыкі карпаратыўнага кіравання і празрыстасці». Мяркуецца, што большасць кіруючых пасад зоймуць жанчыны, а ў дадатак да існуючай страхоўкі для супрацоўнікаў будзе створаны кампенсацыйны фонд.
Увосень 2017 года дзясяткі актрыс абвінавацілі Харві Вайнштэйна ў сэксуальных дамаганнях і гвалце. Праз скандал Вайнштэйн быў звольнены з уласнай кінакампаніі. Пазней The Weinstein Co. была выстаўленая на продаж.
Цяпер чытаюць
У Мінску перадумалі зносіць хрушчоўкі. Рэнавацыя закране двух-трохпавярховыя дамы1
Каментары